WENDOXAN RÊ

Wendoxê delalî,

Ma bi hûmara verêne ya serra 2020î pîya yê! Wa hûmara 63. ma pêrune rê xeyrên ba!

Seke yeno zanayene buroyê Vateyî 05.10.2019 de, Dîyarbekir de dest bi xebata xo kerd. Ge-ge medyaya sosyale de xeberê buroyî vila benê la ma waşt ke derheqê kar û gureyî buroyî de tikê melumat bidê şima.

Buroyê Vateyî yê Dîyarbekirî de gelek aktîvîteyên kulturî û ziwanî benê. Goreyê agahdarîyanê berpirsîyaranê buroyî 9ê teşrîna peyêne 2019î de kursanê ziwanî dest pêkerd. Nê kursî do heta hezîrana 2020î dewam bikê. Yew grûbe de pancês, grûba bîne de vîst wendekarî beşdarê nê kursan benê. Grûba wendişî ya ke abîyayîşê buroyî ra pey dest bi wendişê kitaban kerdo her di hewteyan de yew kitabê edebî wanenê. Dima endamê grûbe yenê pêser û kitabî ser o, munaqeşa kenê, fikrê xo yewbînan rê vanê. Bi no hawa heta nika çend kitabî wanîyay û munaqeşe bîy. Buroyî de semînerî zî yenê dayene, perwerdeyî ser o semînerê mamosta Haydar Diljenî û ekolanê hîkaye ser o semînerê Gursel Akkuşî di nimûneyê na xebat ê. Buro rojanê îne, şeme û yewşemeyan saete 12.00 ra heta 17.00 akerde yo. Abîyayîşê buroyî ra pey kovara Vateyî û kitabê kirmanckî hîna baş wendoxan resenê. Ma zaf qîymet danê nefsqijî û keda xebatkaranê buroyî û ma wazenê ê kar û gureyê xo de hertim serkewte bê.

Wendoxê delalî,

Seke yeno zanayene Grûba Xebate ya Vateyî seba Kombîyayîşê Hîris û Dîyinî mabênê tarîxanê 05.07.2019-08.07.2019î de, Dîyarbekir de kom bîbî. Ma na hûmare de ca danê netîceya nê kombîyayîşî. Grûbe nê kombîyayîşî de hîna zaf termanê beledîya ser o xebitîyabî.

Aydin Batur xebata xo ya dayîşşinasnayîşê mintiqaya Çewlîgî na hûmare de zî domnena. O hem hetê cografîkî ra mintiqaya Karêrî dano şinasnayene hem zî têkilîyanê kurdanê elewîyan û sunîyan ser o behsê tayê hedîseyanê tarîxîyan keno. Roportajê na hûmare Seyîdxan Kurijî Dr. Fikret Yildizî reyde kerdo. Fîkret Yildizo ke kurmancê Anatolî yo hetî ra derheqê kurdanê mintiqa xo de melumat dano, hetî ra zî behsê cuye û nuştoxîya xo keno.

Na hûmara ma de gelek hîkayeyî û şîîrî estê. Ma bawer kenê ke şima nê eseranê edebîyan ra tehm û lezetêde weş gênê. Hîkayeyê na hûmare Bedrîye Topaç, Pinar Yildiz, Munzur Çem û Îsmet Borî nuştê. Şîîrê na hûmare zî yê Canê Dilo, Dilo Bargiran, Îsmet Bor û Îrfan Sîmserkîsijî yê. Destê hemîne kesk bê.

Na hûmara ma de sewbîna zî nuşteyê Dem Xebar, Huseyîn Çatal û B. Şîlanî estê.  J. Îhsan Esparî zî kitabê Nadia Murad ser o nuşto û da-des rîpelê kitabî zî swêdkî ra çarnayî kirmanckî ser.

Heta hûmara bîne bimanê weşîye de!