WENDOXAN RÊ
Wendoxê delalî,
Na hûmara ma de keda tayê wendoxanê ma zaf a çunke înan bi nuşteyanê xo û arêkerdeyanê xo Vate xemilnayo. Wendoxan Kurdîstan, Tirkîya, Ewropa û Awustralya ra keda xo ma rê rusnaya (erşawita). Wa (va) pêro berxudar bê. Hêvîya ma a ya ke bi na hûmara Vateyî rojê şima hîna weş ravêrê.
Mizgîna ma ya na hûmare derheqê weşanîyayîşê yanî neşrbîyayîşê Ferhengê Tirkî-Kirmanckî (Zazakî) û Ferhengê Kirmanckî (Za¬zakî)-Tirkî de ya. Weşanxaneyê Avesta nê di ferhengî pîya se yew kitab Îstanbul de vetî. Nê ferhengan de çekuyê (kelîmeyê) ke heşt Kombîyayîşanê Kirmanckî de ameyê tesbîtkerdiş estê û ferhengî bi xebata kollektîfe amade bîyê. Na xebate ewro wezîfeyê rayberê rastnuştişê kirmanckî (rêberê îmlaya zazakî) zî vînena. Nê ferhengan de tenya çekuyî pêser nêbîyî, semedê ziwanê nuştişî rê formê çekuyan ê weçînayeyî (vîjnayeyî) ameyê pêşnîyazkerdiş. No het ra nê ferhengî ferhenganê bînan ra cîya yê. Kesê ke wazenê kirmanckî (zazakî) binusê ganî nê ferhengan ra îstîfade bikê. Çunke nê ferhengî wareyê kirmanckîya standarde de xebatê kollektîfê verên û tek ê.
Ma hem Vateyî ser o hem zî nê ferhengî ser o rexne û pêşnîyazanê şima pawenê.
Weşîye de bimanê.
