WENDOXAN RÊ
Wendoxê delalî,
Ma ebi hûmara diyine (ikinci sayı) selam danî (dame) şima. Hûmara verêne dim a gelek kesan eleqedarîya xo misnay (nawite); ebi mektube, telefon, faks yan zî qisekerdiş fikr û waştişê xo day zanayene. Fikr û krîtîkê (eleştiri) şima, çi biyaye çi nêbiyaye, yanî çi musbet çi menfî bibê, serî û çiman ser. Hetanî ke ma dest ra bêro ma goşê xo danî şima ser û xebitiyênî ke ebi vateyanê şima vateyê xo roj bi roj hîna weş û hîna zelal bikî.
Her mektuba şima ma rê mesajêk, paştîgirewtişêk (poştîguretenê) û ardimêko fikrî yo. Mektubê ke zînadanê Tirkiya ra ameyê wayîrê manayêka hîna taybetî (susûsî) yê. Nê mektubî pey beranê (çêberanê) kilîtkerdeyan ra, pey «hewt koyan û hewt royan» ra nusiyayê labelê bûya mucadeleyî û xoverrodayîşî (direniş) înan ra yena. Bûya kesanê hêvîdaran, bûya hesreta milet û welatî, hesreta dost û birakan, hesreta ziwanê (zonê) dayke.
Mektuban miyan de zê yê Serdar Bedirxanî tanî mektubî zî estê ke misnenê (nawnenê) ke Diyarbekir de û cayanê bînanê welatî de kesê hessasî, kesê ke perîyodîkanê kurdkîyan ebi ebi diqqet taqîb kenê, kesê ke rûmetê ziwanê şîrînê dayke zanê û no ware de fikiriyênê, wazenê çiyêk bikê estê. Hêvîya ma esta ke meşti do kesê inasarênî (winasî) hîna bibî zaf.
Dewam bikênê ma rê binusênê, kemane û şaşîyeya ma rê vajênê.
Wendoxê erjayey,
Demeyê vetişê na hûmara Vateyî, raştê serra şeştîyine ya Xoverrodayîşê Dêrsimî yeno. Şeştî serrî ra ver, şarê Dêrsimî yê mezlûmî vera gonîweranê bêbextan xo ver ro da. Pîranî û Zîlan û Agrî dim a kurdê Dêrsimî amey qirkerdene, dewî û şaristanê ma amey veşnayene. Îdarekerdoxanê medenîyan (!) ê Tirkiya kalê şeştî-hewtay serreyê zê Seyîd Rizay dar de kerdî. Dar û ber gonî û gonaşîre de xemilnay. Şeştî serre ra pey ewro zî laj û keynayanê (laz û çênayanê) kurdan zê xoverrodayîşan û qirbiyayîşanê bînanê kurdan, ê Dêrsimî zî xo vîr a nêkerdo. Ma rûmet (qîmetê) danî xoverrodayîşê Dêrsimî û şehîdanê Dêrsimî ebi hurmet anî era xo vîr. Na hûmara ma de nuşteyê Mûnzûr Çemî, roportajê Kazim Temurlenkî û şîîra Alî Heyder Severî derheqê xoverrodayîşê Dêrsimî de yê. Nuşteyê ma yê bînî zewbîna wareyan di yê û hêvî a ya ke ebi zer ba şima bê.
Ebi hêviya hûmaranê hîna pêtan (zengînan) û rojanê hîna weşan.
