WENDOXAN RÊ

Wendoxê delalî,

Ma zaf keyfweş îme ke ma bi hûmarêka newa reyna pîya yîme. Na hûmare de zî ma waşt ke hetê muhtewa û formî ra yew kovara ke layiqê şima ya pêşkêşê şima bikîn. 

Nuşteyê ma yo verên bêguman mergê Daîmî Bektaşî yê bêwextî ser o yo. Daîmî sînayoxêkê kultur û miletê ma, kedkarêkê jêhatî yê ziwanê ma bi. O berpirsîyarê kovara Vateyî yê Almanya bi û bi taybetî Berlîn de xebata kirmanckî de kesêko zaf aktîf bi. Nê merdimê erjayeyî 17.01.2016 de, Berlîn de nêweşîya kanserî ra wefat kerd. Ma xemgîn îme, vîndîkerdişê embazêkê winasî ma hemînî dejneno. Na hûmare de Munzur Çemî û çend kesanê bînan Daîmî Bektaşî ser o nuşto. Nuştoxan bi ziwanêkê hîsdarî behsê vîrameyîşanê xo û Daîmî, behsê raywanîya Daîmî ya kilme kerdo. Kerb û kederê xo ma reyra pare kerdo.

Seke yeno zanayene Grûba Xebate ya Vateyî 2016 de bî vîst serra. Nê semedî ra 02.01.2016 de, Dîyarbekir de şewêka kulturî amade bî. Derheqê şewa serrgêra vîst serrîya Grûba Xebate ya Vateyî de nuşteyêkê Haydar Diljenî û nameyê Grûbe ser o zî qiseykerdişê M. Malmîsanijî na hûmare de ca gênî. 

Na hûmare de sewbî zî gelek nuşteyê balkêş estê: Ma vajîme Esra Teyhanî derheqê zîyaranê Dêrsimî de û bawerîya şarê Dêrsimî de rolê nê zîyaran ser o nuşteyêk nuşto. Pinar Yildiz, romanê Denîz Gunduzî Soroyî ser o analîzêk nuşto û Ehmed Kirkan zî kitabêkê tarîxî yê muhîmî dano şinasnayîş. Munzur Çemî strukturê demê vîyarteyî yê nedîyarî yê karan ser o xebatêk kerda. Murad Canşadî nuşteyê xo de marksîzm bi metaforê dewe munaqeşe kerdo, meqaleya bîne ya na hûmare ya Doxan Karasu ya. Şima şênî beşê dîyinî yê nuşteyanê Mutlu Canî, Mahmut Yildizî û Behzat Tosunî zî na hûmare de biwanî. Sanikê ke Turabî Kişinî, M. Salîh Kalkanî û Abdullah Gulerî arê dayî zî abiasan. Na hûmare de hîkayeyêka Nadîre Guntaş Aldatmaz û şîîrê Akman Gedîkî û J. Îhsan Esparî zî ca gênî. Rîpelê fiqra û meselayan rê B. Şîlanî çend tekstê mîzehî amade kerdî.

Wendoxê delalî, 

Grûba Xebate ya Vateyî 03.01.2106 de, Dîyarbekir de dest bi kombîyayîşê 28. kerd. Nê kombîyayîşî de beşdaran rewşa ekonomî ya kovara Vateyî zî munaqeşe kerde. Kovara ma 1997 de dest bi weşanê xo kerd. Nêzdî vîst serrî yo ke fîyatê kovare nêbedilîyayo. Bêguman lazim nîyo ke ma vajîn nê vîst serran mîyan de fîyatê heme çîyan çend sey qatî vêşî bîyo. Heta ke ma ra ame ma nêwaşt fîyatê kovare vêşî bikîn û wendoxanê xo rê bibîn bar. Labelê hûmara 47. pey ma fîyatê kovare zîyade kenî. Seba fîyatanê neweyan keremê xo ra kunyeya kovare ra biewnîn.

Heta hûmara bîne bimanîn weşî de!