WENDOXAN RÊ
Wendoxê delalî,
Yewna roşanê remezanî û serrnewe (serê serre) ame. Serra 2000î zî amey şî.
Aşmanê peyênanê na serre de, Tirkîya de hepisxaneyan de, bi hezaran hepsîyan vera zor û tada dest bi grevanê vêşanîye (vêsanîye) kerd. La berpirsîyaranê (mesulanê) dewlete herunda ke heqê hepsîyan bidê û fek zulm û tada ra verradê, peynîya serre de esker û polisî şawitê (riştê) înan ser; tayê hepsî veşnay, kiştê, bîrîndar kerdê; reyna gonî rişnay. Hepsî zorkanî şawitê hucreyanê hepisxaneyanê tîpa F (F tipi). Wina (inahewa) berpirsîyaranê dewlete nawit (musna) ke ”demokratîk cumhurîyet” sanikê (yew estanike) ya.
Na hûmara ma de nuşteyê nuştoxanê neweyan hîna zaf ê. Ma hepisxaneyanê Sagmalcilar, Saray (Tekîrdag), Semsûr û Bursa ra mektub û nuşteyî girewtê. Gama ke ma nê mektuban de cumleyê sey ”Ma tayê embazî mabênê xo de kirmanckî (zazakî) ser o xebetînîme” yan zî ”Ez o dimilkî jew roman nusena” wendê, ma zaf keyfweş bî. Winî aseno ke Vate nêzdîyê hedefanê xo beno. Mektub û nuşteyanê nê wendoxanê ma, hêvîya ma xurte kerde. Nînan ra tayê, mavajî yê ke hepisxaneyanê Sagmalcilar û Semsûr ra nusenê, eke wina dewam bikerê meşte do eseranê hîna hêcayan binusê. Ma wazenê wendoxanê winasîyan rê ardim bikerê, ma amade yê ke çi ke ma dest ra bêro înan rê bikerê.
Verê ke serra 2000î biqedîyo ”Derheqê Kirmanckî de Kombîyayîşê Heştine” virazîya. Sey kombîyayîşanê bînan nê kombîyayîşî de zî gelekî (xeylê) çeku û termê muhîmî tesbît bîyê. Çeku û termê ke nê kombîyayîşan de tesbît benê hem karê nuştoxan hem zî karê wendoxan asan kenê. Kesê ke kirmanckî (zazakî) nusenê ganî nê çeku û terman ser o zaf vinderê. Na hûmara Vateyî de ma meylanê nê kombîyayîşî weşanenê (neşr kenê).
Mizgîna ma ya na hûmare ”vateonline” a. Kovara Vateyî nîhayet dekewte Internet. Yewine ra heya diwêsine (1-12) metnê (tekstê) heme hûmaranê Vateyî, alfabeya kirmanckî (zazakî) û Ferhengê Tirkî-Kirmanckî (Zazakî) nika Internet de estê. Eke ti wazenî/wazena nînan Internet de biwanî/biwana, adresa ”vateonline” na ya:
www.vateonline.com
Na adrese vila bike, bide hevalan (embazan) û nas û dostanê xo zî.
Wendoxê hêcayî,
Wa (va) roşan û serrneweyê şima xeyrên bo. Xo vîr a mekerê, ma rê binusê.
