WENDOXAN RÊ
Wendoxê erjayey,
Her kovara (dergîya) ke newe vejiyêna hêvîyanê neweyan îfade kena. Kovara Vate ya ke destê to di ya zî hevîyêda newa ya. Na kovare ebi hêviya nuştiş, geşkerdiş, averberdişê lehçeya kirmanckî (kirdkî, dimilkî, zazakî) û xizmetkerdiş û xurtkerdişê kulturê kurdan vejiyêna. Kovarê inasarênî (winasî) ganî rewna bivejiyaynê, ma erey kewtî; labelê ma nêwaşt ke hîna erey kewî û ma waşt çiyo ke ma dest ra yeno bikî.

Kovarî zey projeyan î. Projey estê ke tena xeyalanê kesan de manênî, projey estê ke hetanî cayê şonî, nêmcet manenî; tanî zî estê ke hedefê xo resenî, cay xo gênî. Hêviya ma a ya ke Vate hedefê xo reso.

Şima ke Vate wend şima vînenê ke nuşteyê ciya-ciyay ebi şîweyanê ciya-ciyayan nusiyayê. Ma vajî şîweya Dêrsimî, Çewlîgî, Sêwregi û cayanê bînan. Bêguman ma wazenê ke ziwanê xo standardîze bikerî, labelê no kar rojê de yan zî aşmê (mengê) û serrê de nêbeno. No kar, him wexto derg him zî xebata zanaya û zafe wazeno. No semed ra eke ewro nuştoxê ma tena şîweya xo bizanê yan zî ebi şîveya xo binusê zî ma ganî verra verra giranîye bidî hetanê muşterekan, formanê raştan û rastnuştena (îmlaya) muştereke ser ke ma bişiyî (bieşkê) lehçeya xo standardîze bikerî. Semedê nê karî rê, ganî nuştoxî -hetta wendoxî zî- şîweyanê bînan zî bimusênê (bander bibênê). Ganî ma xo vîrî nêkerî ke kirmanckî kirmanckîya dewa ma û şaristanê ma tena niya, dew û şaristanê bînî zî estê! Ganî ma winî binusî ke tena dewijê yan zî şaristanijê ma nê, kirmancê bînî zî bişiyî (bieşkê) nuşteyanê ma biwanê û fam bikê. Nuştena nuşteyanê inasarênan ewro asan niya. Xora karê nuştoxî bi xo zî karêdo asan niyo, kayê gedan niyo. 

Vateyê ma yê ke ganî bivajiyaynî, ebi seserran o ebi nuştiş mirdî nêameyê vatene. Dişmenî ebi bêbavîye û zulmê xo waşt ke şarê ma kerr û lal û gêj bikero. Hetana ke zeftê ey ser resa zordarîye kerde û keno, waşt û wazeno ke fekê ma kilît bikero. Labelê vera heme tewir zordarîyeya dewleta Romî, şarê ma ziwan û kulturê xo heta ewro pawito. Çi nuştox çi wendox, ma û şima piya ganî nê ziwan û nê kulturî rê wayir vejiyê, ey bipawê, aver (raver) berê û teslîmê azê (nesîlê) newî bikerê. 

Wendoxê delalî, 

Eke fikrê şima estê wa sereyê şima de, eke vateyê şima estê wa fekê şima de nêmanê, ma rê binusênê. Vizêr şima nênuştînî, dişmenî nêverdaynî şima binusênê. Ewro na kovara ma wazena biba platformê fikr, huner û vateyanê şima. Wa sola şima zî no werd de bibo. Xo vîr a mekerênê ke ma nênusî, şima nênusî, şaro xerîb nîno ziwanê ma ma rê nênuseno. Eke ma vateyê xo nêvajî kes vengê ma nêeşnaweno. Senê bieşnawo? Vateyo nevate senî bêro eşnawitiş? 

Kemane û şaşîyeya ma ma rê binusênê. Eke şima Vate ra hes kerd, nas û dostanê xo ra vila bikerênê. Şima zî zanî ke ”yew yew o, di ki bîy keye wo” (jû jû yo, di ke bîy çêye wo). Ma tena meverdê! Ma nê barî piya wegîrî! ”