WENDOXAN RÊ

Wendoxê delalî,

Grûba Xebate ya Vateyî aşma tebaxe ya 2021î de bena 25 serra. Nê prosesê dergûdilayî de ma gelek çîyê baş û weşî dîy. Labelê nê serran de ge-ge zî ma zaf dejay. Tayê serebûtan zerrîya ma veşnaye, qesebaya ma daxnaye. Embazanê Grûba ma ra verê Wisif Hêlinijî dima Ehmedê Dirihî û Memo Darrêzî bêwext wefat kerd. Aşmê ra ver zî xebera kişîyayîşê Polatî (Cemal Aydınî) (01.01.1959 – 15.05.2021) ameye.

Wendoxê delalî,

Polato rehmetî, yew embazo jêhatî, camêrdek, fedakar û wefadar bi. O yew têkoşerê miletê xo bi. Ey serranê 1970î de tevgera welatperwerîya kurdan de cayê xo girewt. Xebata azadî û xoserîya miletê xo de çi ci ra ame texsîr nêkerd. Hem 12ê Êlûle 1980î ra ver hem zî dima seba xebata xo ya sîyasî tepşîya, hepisan de mend. 

Gama ke Grûba Xebate ya Vateyî welat de dest bi kombîyayîşanê xo kerd, çend embazê neweyî bîy endamê Grûbe. Înan ra yew zî Polat bi. O reya verêne Kombîyayîşê Heştêsinî de beşdarê xebata Grûbe bi. No kombîyayîş mabênê tarîxanê 07.08.2010-10.08.2010 de Dêrsim de bi. Dima bêmabên beşdarê heme şîyês kombîyayîşanê Grûbe bi. 

Polatî kirmanckîya mintiqaya xo zaf baş zanayêne. Seba ke hema-hema tim Çêrmûge de şarî mîyan de bi, edet, tore, tevger û têkilîyê sosyalî yê komelê ma weş şinasnayêne. Ey tebîetê welatê ma, nebat û darûberê ma nas kerdêne, derheqê cuya bajar û dewanê ma de zanayîşê ey zaf bi. Coka xebata Grûba ma rê havila ey zaf bî. O merdimê cematî bi, nefsqij bi, pîlan reyra pîl qijan reyra qij bi. Çi wextê xebate de çi zî xebate ra teber Grûba ma mîyan de Polat sembolê ahengdarî bi. Goreyê emrê xo zaf-zaf vîrameyîşê ey est bîy; meseleyê, fiqrayê ey est bîy. O yew nuktedano rastikên zî bi. Bi a dimilîya xo ya weşe gama ke behs kerdêne, merdim terraqa ey ra caran mird nêbîyêne. 

Bi xebera kişîyayîşê ey ma zaf-zaf xemgîn bîy. Polatî hemver nezanî, hemver edetanê sey qesas û dişmenîya mîyanê dewijan zaf mucadele kerd. Labelê çi heyf ke o yew meseleyê aîleyî yê winasî de bi hedef ke qet eleqeyê xo pê çin bî. Cayê ey timûtim zerrîya ma de yo.

Wendoxê delalî,

Na hûmara ma de verê şima yew meqaleya Nadîre Guntaş Aldatmaz, bi nameyê ”Folklor û Nasnameyo Kolektîf”î wanenê. Beşê hîrêyinî yê xebata etîmolojî ya M. Malmîsanijî zî na hûmare de ca gêna. Seke şima zanê hûmaranê 66. û 67. de ma di beşê na xebate neşr kerdbîyî. Na xebate de etîmilojîyê çekuyanê kirmanckî ra teber derheqê lehçeyanê kurdkîyanê bînan de zî gelek melumat esto. Nê hetî ra yew xebata bêemsal a. Terapîsta kayî û pispora famîlya û gedeyan Menekşe Akalin warê xebata xo ra yew meqaleya balkêşe ma rê şawita. Akman Gedîkî, Îsmet Borî û Doxan Karasuyî zî hîrê babetanê cîyayan ser o nuşto. Şîîrê na hûmare MM, Perî Kaya, Dilo Bargiran û Îdris Yazarî nuştê. Seba yadkerdişê Polatê rehmetî ma yew şîîra ey ya ke 1992 de neşr bîya newe ra neşr kerde. Hîkayeyê na hûmare Hesen Polat, Bedrîye Topaç û Zerrweş Xodî nuştê. Pinar Yildiz gêrayîşê xo yê Parîsî ser o nuşto, Îdris Yazarî zî yew meselaya weşe Wisê Cimî ra eşnawita û seba na hûmara ma nuşta.

Heta hûmara bîne bimanê weşîye de!