WENDOXAN RÊ
Wendoxê delalî,
Hûmara peyêne ya serra 2018î zî şima resaye. Sey redaksîyonî amancê ma yo yewin o yo ke ma kovare wextê xo de amade bikîn. Nika gama ke ma xo ra dime nê çar serranê peyênan ra ewnîyênî, ma vînenî ke destpêkê serra 2015î ra heta nika ma her serre çar hûmarê kovara Vateyî weşanay. Amancê ma yo dîyin o yo ke ma hetê muhtewa û formî ra kovarêda başe pêşkêşê şima bikîn. Labelê nê xususî de ma nêşîyênî zaf çî vajîn, kalîteyê kovare ser o qala peyêne timûtim wendoxî vanî. Amancê ma yo hîrêyin zî o yo ke ma kovare bi hawayêde serûber vila bikîn, wendoxan biresnîn. Vilakerdişê kovare de tayê problemê ma yê muhîmî estî. Nê probleman ra tayê pabesteyê redaksîyonî yî, gelek reyî kovare wextê xo de bi yew hawayo sîstematîk û lezkanî nêresena cayanê ke ganî biresa.
Semedê halkerdişê nê meseleyî ma ganî strukturêk baş awan bikîn ke ma bieşkîn na xebate taqîb bikîn. Problemê bînî yê heme heskerdoxanê kovar î. Çunke xebata ma xebatêda kollektîf û îdeal a, her kes eke bi hawayêde aktîf beşdarê karê kovare nêbo, mavajî eke kovare rê nênuso, vila nêko, aboneyan peyda nêko o wext na xebate amancanê xo ra dûrî kewena. Ma hêvî kenî ewro ra pey wendox û heskerdoxê Vateyî wayîrîya kovara xo kenî û heme çî ra ver her kes xo ver de kovare vila keno.
Wendoxê delalî,
Na hûmara ma de hîrê xebatê bîyografîkî estî. Xebata verêne zehmetkêş û nuştoxê ziwan û kulturê ma Munzur Çemî ser o ya. Mutlu Canî derheqê Munzur Çemî de yew dosyaya dayîşşinasnayişî amade kerda. Na dosya de ca dayo bîblîyografyaya nuşte û kitabanê ey zî. Tena na bîblîyografya, kede û xebata nuştoxî ser o yew fikir dana ma.Yew dosya zî Mehmed Selîm Uzunî derheqê Mela Mehmed Elî Hunî de amade kerda. Mela Mehmed Elîyo ke nika 88 serre yo û hema zî nuseno, bi metnanê xo yê dînîyan yeno şinasnayene. Selma Dogu zî tarîxê edebîyatê kurdan de şaîranê tewr verênan ra Baba Tahirê Uryan dayo şinasnayene.
Aydin Baturî na reye rewşa cografîke, demografîke û bawerîya qezaya Çêrmeyî (Yedisu) ser o yew nuşte amade kerdo. Hîkayeyêda Îsmet Borî û ya Hasan Alkişî ra teber yew metnê Akman Gedîkî zî na hûmare de ca gênî. Şîîrê na hûmare Pinar Yildiz û Şeyda Asmîn nuştî. Nuşteyê ma yo peyên derheqê mîtolojîyê ziwanan de yo ke Îsmet Borî amade kerdo.
Heta hûmara bîne bimanê weşîye de!
