WENDOXAN RÊ
Wendoxê erjayeyî,
Ma bi hûmarêka newa ya kovara Vateyî pîya yê. Sey hûmaranê bînan na hewe zî ma ca dayo nuşteyanê cîya-cîyayan. Na hûmare de şîîrî, cigêrayîşî, meqaleyî, sanikî, roportajêk, hîkaye û gelek babetanê bînan de nuşteyî estê. Kovare bi muhtewaya xo ya dewlemende destê şima de ya, coka ma nêwazenê behsê nuşteyan yew bi yew bikê. Heta ma ra yena ma wazenê hetê form û muhtewa ra kovarêka bi kalîte pêşkêşê şima bikê. Eke şima pêşnîyaz û rexneyanê xo ma rê bişawê, ma şa benê.
Gama ke ma na hûmare hazir kerdinê, Grûba Xebate ya Vateyî destpêkê aşma nîsane de, seba kombîyayîşê 27. Sêwregi de kom bî. Grûbe çar rojî Sêwregi de mêmanê Komela Ziwanê Kurdî “KOZIK”î bî. Endamê Grûbe xebata xo ya edetî ra teber, beşdarê di aktîvîteyanê kulturîyan yê “KOZIK”î zî bîy. Nê aktîvîteyan ra yew şewa şîîran bî: Na şewe de Bedrîye Topaç, Îhsan Espar, Fahrî Ergun û Îlyas Gîzlîgolî şîîrê xo wendê. Şewa dîyine de zî ziwanî ser o panelêk amebi amadekerdiş. Nê panelî de Haydar Diljen û Serkan Naryapragî rewşa ziwanî ser o qisey kerd. Her di aktîvîteyan de zî gelek sêwregijî amade bîy. Heta goreyê vatişê tayê embazan12ê Êlule ra pey, Sêwregi de reya verêne bî ke şewêka kulturî ya kurdkî de hende merdimî ameynî pêser. Nê şewî û aktîvîteyî gelek hetanê bînan ra zî balkêş bîy: Mavajî, Sêwregi de hende kitabê kirmanckî yew ca de caran kesî nêdîbîyê. Hende kesê ke kirmanckî ser o gurîyênî caran pîya nêameybîyê Sêwregi. Kirmanckî ser o munaqeşeyê wina hîra û xorînî caran tîya nêbîbîyê. Labelê tîya de merdim ganî sewbî çîyan zî vajo: Nê her di şewî zaf baş ameybîyê organîzekerdiş. Wina fehm bînî ke endam û sermîyananê KOZIKî hazirîya xo baş kerdibîyê û weş xebitîyaybîyê. Ma sey redaksîyonê kovare heme endam û sermîyananê KOZÎKî rê gelek sipas kenê û ma vanê, hezar reyî keyeyê înan awan bo ke xo kerd binê nê barî. Reyna ma embazê xo Haydar Diljen û birarzayê ey Doxan Otluyî rê sipas kenê ke ma dewa Xerzîno de mêman kerdê û ma mintiqaya Bucaxî ra çarnayî.
Wendoxê erjayeyî,
Serra 2016î de, Grûba Xebate ya Vateyî bena vîst serra. Seke yeno zanayîş Grûbe reya verêne 1996 de Stokholm de kom bî. Verê ke na Grûbe dest bi nê karî bika, lehçeya ma de zaf çîyê nuşteyî çin bîy, mavajî tena 23 hebî kitabê kirmanckî estbîy. Ewro hûmara kitabanê weşanîyayan di sey ra vîyarta, ewro weşanxaneyî, rojnameyî, kovarî û keyepelê kirmanckî estê. Gelek bajar û qezayan de semîner û panelê kirmanckî û sewbî tevgerê kultur û ziwanî yenê amadekerdiş. Medyaya sosyale de babet-babet aktîvîteyê kirmanckî benê. Bêguman nê karan pêrune kedkar û xemkêşê nê ziwanî kenê. Bi fedekarîya şexsî xo danê nê karan ver. Zafaneyê nê kesan yan Grûba Xebate ya Vateyî de yê yan zî piştî danê na Grûbe. Coka ma bawer kenê ke Grûba Xebate ya Vateyî xebata kirmanckî de yew dînamîzmo xurt xeliqna, strukturê kirmanckîya nuştekî awan kerd û nuştişê kirmanckî de tayê standardî peyda kerdê. Bi na xebate vera-vera qedr û qîymetê kirmanckî vêşî bi. Ewro cîhana edebî û hunerî ya kurdkî de qalê çekuyanê ma zî beno, erja çekuyanê ma zî esta. Labelê ma zanê no prosesêko derg o û karê ma hema zaf zaf o.
Kombîyayîşê 27. de Grûba Xebate ya Vateyî qerar da ke 02-01-2016 de Dîyarbekir de seba pîrozkerdişê vîst serrîya Grûba Xebate ya Vateyî şewêka şayî ya kulturî amade bika. Heta nika 48 kesî xebata Grûbe de amade bîyê. Heme nê 48 kesî dawetê na şayî benê. Çunke na xebate bi keda nê 48 kesan heta ewro resaya. Her kesî goreyê hêz, rewşe û zanayîşê xo piştî daya nê karî. Grûbe wazena seba rence û zehmetîya nê kesan înan rê sipas bika û hêvî kena nê embazî ewro ra pey zî wayîrîya na xebate bikê. Seba amadekerdişê na şewe nê çar embazan ra yew grûba xebate ameye weçînayene: Netîce Altun, Nureddîn Celalî, Muzaffer Xeylanij û Ehmed Kirkan.
Peynî de ma wazenê endamanê redaksîyonê verênî ra Munzur Çem û Mehmed Selîm Uzunî rê zaf sipas bikê. Ked û xebata înan na kovare de û na xebate de zaf a û ma zanê ke her gama ke ma rê hetkarî lazim biba nê embazî xo apey nêdanê.
Heta yewna hûmare bimanê weşî de.
