WENDOXAN RÊ
Wendoxê delalî,
Wexto ke ma na hûmara diwêsine (des û diyine) amade kerdinê, hûmara pancin û şeşina Vateyî zî Tirkîya de newe ra weşanîyay (neşr bîy). Sey çar hûmaranê verînan, nê her di hûmarî zî Tirkîya û Kurdistan de vila benê. Ma bi naye zaf şa yê. Reyna nê hamnanî çend kitabê neweyê kirmanckî (zazakî) Tirkîya de vejîyayê. Ma hêvî kenê ke ewro ra pey zî xebata ziwan û edebîyatê ma bi eseranê neweyanê hêcayan aver (raver) şêro.
Na hûmara ma de reyna nuşte û şîîrê ke welat ra ameyê zî estê. Seke ma verî zî nuştbi nuşteyê ke welat ra yenê, bi taybetî nuşteyê hepsîyan ma zaf şa kenê. Sayeyê nê nuşteyan de wendoxê ma yê zerreyî û teberî yewbînan zîyaret kenê û pê şa benê. Dûrî benê nizdî, nizdî benê hîna nizdî.
Nê rojan de Tirkîya tayê peymanê mîyannetewî (uluslararası antlaşmalar) mor kerdê ke goreyê nînan ganî heq û huqûqê neteweyanê (miletanê) bindestan qebul biko. Bêguman tecrubeyî nawnenê (musnenê) ke Tirkîya peymanan mor kena la wezîfeyanê xo nêana ca. Ganî na rey kurdî hîna dîqqet bikê, hîna xo verro bidê, mucadele bikê ke dereceya maksîmûme (azamî) de heqanê xo bigîrê. Vajîyaya ya ke ”Heq nêdîyêno, gîrêyêno”, yanî heq nîno dayene, yeno girewtene. Kurdî ganî heqanê xo biwazê labelê heqanê şexsî (bireysel haklar) nê, heqanê milî (netewî)! ”Heqê şexsî” bes nîyê û na propaganda bi xo zî dekan (xapan) ra yew dek a, ganî ma nêdekewê na deke.
