WENDOXAN RÊ
Wendoxê delalî,
Hûmara 65. ya kovara Vateyî ma pêrune rê xeyrêne ba. Zerrîya ma de cayê na hûmare tikê cîya yo, çunke sebebanê Musabeqaya Şîîr û Hîkayeyanê 2020î ra yew zî pîrozkerdişê hûmara 65. yo. Tarîxê beşdarîya musabeqa 15ê tebaxa 2020î de qedîya. Heta roja peyêne zî musabeqa rê tayê eserî amey. Ma bi keyfweşîye wazenê vajê ke beşdarê musabeqaya 2020î yê musabeqaya 2017î ra zafêr ê. Ma nika ra heme beşdaran rê gelek sipas kenê. Heme eserê ke amey, her di jurîyan rê yenê şawitene û seke ma verê zî nuştbi, netîceya musabeqa 20ê kanûna 2020î (20.12.2020) de Dîyarbekir de îlan bena û yena dayene.
Wendoxê delalî,
Grûba Xebate ya Vateyî semedê Kombîyayîşê 33. ra mabênê tarîxanê 23.02.2020-26.02.2020î de, Dîyarbekir de kom bî. Na hûmare de ma netîceya xebata nê kombîyayîşî neşr kenê. Seke şima vînenê Grûba na reye çekuyanê gelek babetanê cîyayan ser o xebitîyaya. Sewbîna zî na hûmare de nuşteyê gelek cîyayî estê.
M. Malmîsanijî ma rê bi nameyê “Pîrê Pîran”î yew nuşteyo balkêş nuşt. Nê nuşteyî de hem etîmolojîyê çekuya Pîranî îzeh beno hem zî derheqê zîyaret û perestgehanê derûdorê Pîranî de gelek melumat yeno dayene. Na hûmare de hîrê efsaneyê Koyî Bîngolî estê:
Celadet Alî Bedirxanî yew defterî de, bi destê xo di efsaneyê Koyê Bîngolî bi kurmanckî nuştê. M. Malmîsanijî nê efsaneyî seba çape amade kerdê. Efsaneyê hîrêyinî zî yew mîsyonerê swêdijî peynîya serranê 1800î de nuşto û J. Îhsan Esparî swêdkî ra açarnayo kirmanckî ser. Nê nuşteyî de derheqê kurdan û Kurdistanî de gelek melumatê bînî zî estê.
Wendoxê delalî,
Aydin Batur gêrayîş û teswîrkerdişê mintiqayanê Çewlîgî domneno. Na reye herêma Qerbaşan dano şinasnayene. Şima zanê kovara ma de şîîrê zaf weşanîyêne labelê na hûmare de, şima açarnayîşê şîîranê Sohrab Sepehrî û Konstantîn
Kavafîsî vînenê. Newzad Valêrî şaîrîya Sepehrî nuşta û di şîîrê ey açarnay kirmanckî ser. Ugur Sermîyanî zî bi kilmî Kavafîs dayo naskerdene û yew şîîra ey açarnaya ziwanê ma ser. Na hûmare de şima şîyênê şîîranê Canê Dilo û J. Îhsan Esparî zî biwanê. Hîkayeyê na hûmare, Bedrîye Topaç, Pinar Yildiz, Adir Dêrsimij û Mehmud Nêşiteyî nuştê. Doxan Karasuyî bi nameyê “Dejê Eşq”î yew meqale, Îsmet Borî zî yew vîrameyîşê xo nuşto. Akman Gedîkî yew resamo kirmanc dayo şinasnayene û Zerrweş Xodî zî yew sanike newe ra nuşta.
Heta hûmara bîne bimanê weşîye de!
