WENDOXAN RÊ

Wendoxê birêzî
Ma bi hûmara (sayı) çarine newe ra pîya yî. Bi na hûmare serra ma debena. Serrêk ra ver ma dest bi vetişê Vateyî kerdbi. 

Sey hûmaranê bînan, na hûmara ma de zî çi edebî, çi folklorîk, çi derheqê tarîx û ziwanî de nuşteyê ciya-ciyayî estê. Hetanî ke ma dest ra yeno ma wazenê ke kovarêk layiqê şima wendoxan amade bikerê. Ma elaqe û piştîdayîşê şima hemînî rê zaf sipas kenê û hêvî kenê ke na hûmare bi zerr ba şima bo. 

Nuştox û wendoxanê ke ma rê hetanî ewro nuşt, kovare hîna xurt kerde. Bi taybetî yê ke Kurdîstan û Tirkîya ra nusenê, seke bûya welatî xo reyra bîyarê, moralê ma pêt kenê. Hîna zaf zî gama ke behsê hedîseyanê welatî û şarê ma kenê. Ma ewro ra pey zî nuşte û mektubanê şima pêroyînî pawenê. 

Tanî wendoxan zî bi ardimê maddî piştî day Vateyî; sey Kamîl, Ezîz Bazencîr, Wisif Kaymak, Şukrî Derîn û çend wendoxanê bînan. Bi ardimê nê kesan Vate welat de zî çap bi, ma înan rê zaf sipas kenê. 

Hêvîya ma a ya ke şima wendoxê delalî yê ke hetanî nika abone nêbîyê ewro ra pey bibê abone. Şima yê ke abone yê zî xo vîr a mekerê ke bi na hûmare aboneyîyeya şima ya serrêk qedîyêna, ganî (gerek) şima aboneyîyeya xo newe bikerê. 

Peydakerdeşê aboneyanê neweyan de zî ma şima wendoxan ra ardim û desteg wazenê. 

Qapaxê peynî yê na hûmare de ma yew (jû) fotografê Pîranî çap kenê û embazê (hevalê) şawitoxî (rusnayoxî) rê sipas kenê. Ma şima wendoxanê bînan ra zî fotograf, risim, karîkatur û nuşteyan pawenê. 

Bi hêvîya rojanê hîna weşan…