Wendoxê delalî,

Ma bi hûmarêda newa ya Vateyî reyna pîya yê. 

Seba ma wendox û nuştoxanê kirmanckî (zazakî) tebaxe yew aşma taybetî ya. Yew serre pêdima na aşme de di çîyê gelek girîngî qewmîyay. 2ê tebaxa 1996î de Grûba Xebate ya Vateyî reya verêne kom bî. Nê kombîyayîşî de qerar ame girewtene ke na Grûbe bi hawayêde perîyodîk serre de reyê-di reyî kom biba û kirmanckî ser o bixebitîya. Na aşme de awanbîyayîşê Grûbe ser ra kutakut 25 serrî vîyartê. Grûbe nê 25 serran de ca û welatanê cîyayan de 33 reyî kom bî. Semedê janê ”Covîd-19”î ra demêk nêşîyaye kom biba, la seba Kombîyayîşê 34. do kanûna 2021î de reyna dest bi xebata xo bika. Grûbe 25 serrî yo ke bêmabên ziwanê ma ser o xebata xo domnena. Ma 25 serrîya Grûbe pîroz kenê û heme amadebîyayoxanê na xebate rê sipas kenê.

Ma bêrê qewmîyayîşê dîyinî ser: Grûba Xebate ya Vateyî Kombîyayîşê 2. de qerar girewt ke yew kovara kulturî biweşana. Tebaxe 1997 de hûmara 1. ya kovara Vateyî weşanîyaye, tebaxa serra 2021î de zî hûmara 69. destê şima de ya. Kovara Vateyî zî 24 serrî yo ke weşanê xo domnena. Nê 69 hûmarê Vateyî nêzdîyê 9000 rîpelî yê. Kovare de gelek eserê edebî û folklorîkî, xebatê ziwanî, meqaleyê îlmî û sewbîna gelek waran de nuşteyî weşanîyay. Raywanîya ma çend dergûdila ba zî ma bawer kenê hema kêmanîyê ma zaf ê, coka ma timûtim cehd kenê ke kovarêka hîna başe û hîna dewlemende pêşkêşê şima bikê. Coka ma wazenê şima bi pêşnîyaz û rexneyanê xo seba yew kovara hîna başe hetkarîya ma bikê.

Wendoxê delalî,

Seke yeno zanayene seba Xelata Hîrêyine ya Kovara Vateyî musabeqaya hîkaye û şîîranê kirmanckî organîze bîya. Tarîxê beşdarbîyayîşî yo peyên 01.11.2021 o. Şertê musabeqa verê îlan bîbîy la şima na hûmare de zî şîyêne ê şertan biwanê. Xelata Kovara Vateyî 19.12.2021 Dîyarbekir de îlan bena û yena dayene. Beşdarê Musabeqaya Dîyine yê Musabeqaya Yewine ra gelek zafêr bîy, heta beşê hîkaye de beşdarê Musabeqaya Dîyine di qatê Musabeqaya Yewine bîy. Ma hêvî kenê ke nîsbetê beşdaranê Musabeqaya Hîrêyine yê dîyine ra hîna zafêr bo.

Wendoxê delalî, 

Na hûmare de verê şima yew hîkayeya Munzur Çemî ke îthafê embazê mayê rehmetî Polatî kerda, wanenê. Duyês embazanê Grûba Xebate ya Vateyî zî seba yadkerdişê Polatî hîs û fikrê xo bi yew hawayo kilm nuştê. M. Malmîsanijî yew şîîra Baba Tahîrê Hemedanî ya gelek xorîne û weşe lurrkî ra açarnaya kirmanckî ser û Vateyî rê şawita. Hîrê şîîrê bînê ke na hûmare de ca gênê yê J. Îhsan Espar, Adir Dêrsimij û Hêvî Xebarî yê. Na hûmare de ma beşê IV. yê xebata etîmolojî ya M. Malmîsanijî weşanenê. “Zerra Haya”ya Mela Mehmed Elî Hunî zî bi transkrîpsîyonê Mehmed Selîm Uzunî na hûmare de ca gêna. Harûn Bozkurtî hîkayeya Beyi Se Bena de “îmajê cinî”yan ser o nuşto. Mistefa Gomayij û Îsmet Borî çend meseleyê weşî şawitê. J. Îhsan Esparî bi minasebetê 25 serrîya Grûba Xebate ya Vateyî yew nuşteyo înformatîf amade kerdo. Hîkayeyê na hûmare Akman Gedîk û Newzad Valêrîyî nuştê.

Heta hûmara bîne bimanê weşîye de!