WENDOXAN RÊ
Wendoxê erjayeyî,
Seke yeno zanayene nê hîrê aşmanê peyênan de merdimîye rastê yew xafila bêgumane ameye. Janê vîrusê “Covîd 19”î destpêkê serra 2020î de Çîn de vejîya, vera-vera heme dinya ra vila bi. Mîlyonan reyra merdimî nê vîrusî ra nêweş kewtî û heta nika hîrê sey hezar kesan dinya xo bedilnaya. Dinya hema zî binê tesîrê na bobelata nêdîyaya de ya. Hema zî pisporî nêzanê merdimîye nê janê bêemanî ra senî û key xelisîyêna.
Ma zanê ke semedê nê janî ra hûmara ma ya 63. heme wendoxanê ma nêresay. Ma hêvî kenê gama ke na hûmara ma çapxane ra vejîyêna rewşe tikêna aramêr biba. Xebata ma sewbîna hetan ra zî vîrusê “Covîd 19”î ra muteesîr bîya. Seke şima zanê ma hûmara 63. de îlanê “Xelata Dîyine ya Kovara Vateyî/Musabeqaya Hîkaye û Şîîranê Kirmanckîyan” weşanabi. Uca ma vatibi “tarîxê beşdarbîyayîşî yo peyên 15ê hezîrana 2020î” yo. Semedê nê janî ra ma no wext di aşmî derg kerd. Nika “tarîxê beşdarbîyayîşî yo peyên 15ê tebaxa 2020î” yo. Labelê şertanê musabeqa de sewbîna çîyekî nêvuryayo (nêbedilyayo). Xelata Kovara Vateyî, 20ê kanûna 2020î (20.12.2020) de Dîyarbekir de îlan bena û yena dayene.
Wendoxê erjayeyî,
Serdar Akdagî tayê sanikî û deyîrî dewa xo Kilîseyî -pabesteyê Şankuşî ya- ra arê kerdbîy û ma rê şawitibîy. Xebata Serdar Akdagî zaf biserûber bî. Labelê semedo ke na dewe ra tekstê tewr verênî bîy, coka ma semedê wendiş û redaksîyonî ra mamosta Malmîsanijî rê şawitê. Keyeyê ey awan bo ey zî tekstî wendê û şeklo peyên da ci û ma rê şawitê. Fekê dewa Kilîseyî gelek hetan ra balkêş o. Ferhengeko ke Serdarî amade kerdo fehmkerdişê tekstan zaf asan keno.
Aydin Baturî “Herbê Qirrikê Mendoyî” ser o nuşto. Hawayo ke nê nuşteyî ra fehm beno, na mintiqa de wextê Cengê Şêx Seîdî de mabênê hêzanê kurdan û dewlete de yew lejo gird qewmîyayo. Nê nuşteyî de derheqê nê serebutî de zanayîşê muhîmî estê.
Di xebatê bîblîyografîkî zî na hûmare de ca gênê: Duygu Çelîk projeyê masterê bêtezî yê Unîyersîteya Artûklûyî beşê kirmanckî yê rojnameyê Basî ser o nuşto. Aye heme nuşteyê kirmanckî yê 44 hûmaranê Basî goreyê babetanê înan tesnîf kerdê. Welat Ramînazad zî fîlm, kilmfîlm û fîlmê belgekîyê ke tede kirmanckî qisey bena tesbît û kategorîze kerdê. Na hûmare de di roportajî estê, înan ra yew Muzafer Ozgurî reyde o bîn zî Îbrahîm Xaşxaşî reyde bîyo. Hîkayeyê na hûmare Pinar Yildiz, Mehmud Nêşite û Zerrweş Xodîyî nuştê. Îsmet Borî zî vîrameyîşêkê xo nuşto. Akman Gedîkî yew albumê Soner Soyerî dayo şinasnayene û Doxan Karasuyî zî bi nameyê “Qerar, Bêqerar û Biqerar”î yew meqale nuşta. Şîîrê na hûmare Dilo Bargiran, Abdullah Yakişan, Îrfan Sîmserkîsij û J. Îhsan Esparî nuştê.
Heta hûmara bîne bimanê weşîye de!
