WENDOXAN RÊ
Wendoxê delalî,
Ma wazenî bi yew xebera weşe dest pêbikîn. Beno ke tayê wendoxê ma medyaya sosyale ra amedekarîya buroyê Vateyî yê Dîyarbekirî ra xeberdar bîyî. Goreyê qerarê xebatkaranê buroyî, eke yew manî nêvejîyo, 1ê aşma êlula 2019î de buroyê Vateyî Dîyarbekir de dest bi xebata xo keno. Cayê buroyê Vateyî Dîclekent de, goşeyê “Parkormanî”, hetê Nêweşxaneyê Memorîyalî de yo. Ma bawer kenî ke 1ê êlule ra pey wendoxê kovare eşkênî kovara Vateyî û kitabanê kirmanckîyan nê buroyî ra peyda bikîn. Û ma hêvî kenî ke bi abîyayîşê buroyî Vateyî kovare tena Dîyarbekir de ney la cayanê bînan ra zî bi hawayêde biserûber vila bena. Ma heme kedkaranê na xebate rê nika ra serkewtiş wazenî.
Wendoxê delalî,
Na hûmare de ma xebatêka tarîxî ya muhîme yê M. Malmîsanijî neşr kenî. Ma na xebate ra musenî ke serekê serewedaritişê Agrî Îhsan Nûrî û embazanê xo serranê 1930î de, demê serewedaritişî, bi nameyê Agrî yew rojname weşanayo. No rojname pêro bi kurdkîya kurmancî yo, nuşteyê rojnameyî bi herfanê erebkî nusîyayî û her di hûmarê ke M. Malmîsanijî peyda kerdî bi dest ameyî nuştene. Bi na xebate, rasterast qelema serewedaritoxan ra, derheqê serewedaritişê Agrî de, gelek melumato newe wendoxan reseno.
Wendoxê delalî,
Babet-babet nuşteyî na hûmare ma de ca gênî. Aydin Batur semedê dayîşşinasnayîşê welatê ma ra na reye mintiqaya Govdereyî ra gêrayo. Hem şarê ê cayan reyra qisey kerdo û hem zî tayê çimeyanê nuştekîyan ra tayê şexsîyet û hedîseyê Govdereyî day naskerdene. Nureddîn Celalî semedê yadkerdişê nuştox û embazê ma Ehmedê Dirihî ra yew nuşteyo bîyografîk nuşto. Şîîrê na hûmare hetê Akin Yanardag, Mehmed Selîm Dêreyij û Bazîd Cîhangîrî ra nusîyay. Meqaleya Welat Ramînazadî derheqê hîrê romananê kurdkîyan yê verênan de ya. Ey waşto nê heme hîrê romanan, Şivanê Kurmancan, Pêşmerge û Kilama Pepûgî, hetê nasnameyê neteweyî ra analîz û muqayesê biko. Doxan Karasuyî zî rike û rikdarîye ser o yew meqale nuşta. Munzur Çemî derheqê nuştoxîya xo de nuşteyêde bîblîyografîk amade kerdo. Yew deyîra Dêrsimî ya eşqî hetê Ugur Sermïyanî ra vîdeo ra ameya nuştene. Huseyîn Çatalî yew hedîseyê tarîxî yê 1938ê mintiqaya Erzinganî ser o bi nameyê ”Mezela Bêwayîre” nuşteyêk balkêş nuşto. Hîkayeyê Mehmud Nêşîte û Pişar Xançûkijî zî na hûmare de ca gênî.
Sey nuşteyê peyênî yê na hûmare şima çend vateyanê verênan û îdyomanê Serdar Bedirxanî vînenê.
Heta hûmara bîne bimanîn weşîye de!
