WENDOXAN RÊ
Wendoxê erjayeyî,
Ma bi xeyr û weşîye bi hûmarêka newa ya Vateyî pîya yê. Seke şima zanî ma 9ê aşma nîsane de, Dîyarbekir de, merasîmê Xelata Kovara Vateyî, salona Weqfê Îsmaîl Beşîkçî de amade kerd. Uca her di beşan de eserê yewinî amey eşkerakerdene û xelatî amey dayene.
Tîya de ma wazenî derheqê proses û netîceya Xelata Kovara Vateyî de tayê agahîyanê bînan bidîn. He-ta 28ê sibata 2017î 15 şîîrî û 13 hîkayeyî amey adresa xelate. Hîrê kesî hem bi yew şîîre hem zî bi yew hîkaye beşdarê musebeqa bîy. Di beşdaran ra her yewî di şîîrê xo musebeqa rê şawitibîy. Her jurî eserê beşê xo wendî û puanê xo day. Goreyê puananê jurîyê şîîran rêza panc şîîranê verênan wina ya:
1)Ugur Sermîyan Birînê Tegelinî
2)Qemer Erdogan Şêmiga Emrî
3)Umer Barasi Dijeyê Pistanan
4)Alî Aydin Çîçek Bîro Kor
5)Muhammed Mamet Qetekonij Xezaleka Welatê Mi
Beşê hîkayeyan de rêza dîyine de, puanê di hîkayeyan sey yewbînî yê yanî rêza dîyinî di hîkeyeyî estê. Goreyê puananê jurîyê hîkayeyan rêza panc hîkayeyanê verênan wina ya:
1)Qemer Erdogan Şadîya Şade
2)Hesen Polat Nan û Zeytunî
2)Alî Aydin Çîçek Raywan
3)Îsmet Bor Ê Ke Pey De Manenê
4)Murad Canşad Eşqê Gêjî
5)Enwer Yılmaz Pencera
Ma îlanê şertanê musabeqa de wina nuştbi: “Her di eserê ke xelata yewine bigîrê, do kovara Vateyî de bêrîn weşanayene. Eke redaksîyonê kovara Vateyî munasib bivîno, şêno eseranê bînan zî kovare de biweşano.” Na hûmare de ma her di eserê xelata yewîne weşanay. Eke çîyêko taybetî nêqewmîyo ma hûmaranê 53. û 54. de heme nê eseranê corênan weşanenê. Zafa-neyê eseranê bînan yê musabeqa zî redaksîyon goreyê rewşe do pêdima biweşano.
Gelek eserê ke musabeqa rê amebî şawitene hetê kalîteyê edebî û ziwanî ra baş bîy. Eke îmkanê ma bibîy ma wazenî musabeqayanê winasîyan or-ganîze bikîn û bi nê hawayî kalîte û prestijê kirmanckîya nuştekî berz bikîn û nuştoxanê ziwanê xo teşwîq bikîn.
Wendoxê erjayeyî,
Na hûmare de şima şîîra Ugur Ser-mîyanî, hîkayeya Qemer Erdoganî û merasîmê Xelata Kovara Vateyî ser o nuşteyê Murad Başaranî û qi-seykerdişê J. Îhsan Esparî vînenî.
Sewbîna na hûmare de Murad Canşadî bi nameyê “kirmanckî de suffîksê muceredîye” yew meqale nuşta. Canşadî suffîksî cîyayî goreyê mintiqayan tesbît kerdî û çimeyanê nuştekîyan ra nimûneyê nê suffîksan day. Nuşteyê Mehmet Selîm Uzunî, Ehmedê Xasî û Mewlidê Nebî, beşê çarinî û peyênî na hûmare de ca gêno. Na hûmare de Pinar Yildiz bi nameyê “Hîcrane” hîkayeyêke nuşta, Newzad Valêrî zî yew şîîra Sohrab Sepehrî fariskî ra çarnaya kirmanckî ser. Alî Aydin Çîçekî şaîr û deyîrbaz Saît Bakşî reyde qisey kerdo û eseranê ey ra nimûneyî pêşkêş kerdî. Zîyadîn Îpekçî mintiqaya Bongilan ra di estanekê bi fekê mintiqaya xo nuştî.
Roşan Lezgîn û Harûn Bozkurtî fihrîstê şîîranê kovaranê Tîrêj, Vate, Şewçila û rojnameyê Newe-pelî amade kerdo. Na hûmare de ma ca dayo na xebata her di nuştoxan. Na xebate de derheqê şîîranê nê çar weşanan de melumat zaf o, mavajî: “Nê her çar weşanan de 835 şîîrê 231 kesan weşanîyayê ke nînan ra 25 kesî cinî yê.”
Heta hûmara bîne bimanê weşîye de!
