WENDOXAN RÊ
Wendoxê delalî,
Bi piştîdayîşê şima, ma bi rîsipênî hûmara pancasine ya kovara Vateyî zî resnaye şima. Bêguman tena seba Vateyî ney, kamcîn kovare bena a zana, weşanîyayîşê hûmara pancasine hedîseyêko zaf gird o. Coka heqê ma esto ke ma bi wendoxan, nuştoxan û destekdayoxanê kovara xo îftixar bikîn. Na kovare netîceya aqil, rence û îdealanê ma yê muşterekan a. Helbet sey redaksîyonî ma zaf bextîyar îme ke amadekerdiş û weşanayîşê na hûmare bi qismetê ma.
Wendoxê delalî,
Seke şima zanî hem seba pîrozker-dişê hûmara 50. ya Vateyî hem zî seba berzkerdişê qedr û qîymetê nuştişê kirmanckî (zazakî), Grûba Xebate ya Vateyî kombîyayîşê 29. de qerar da ke yew musabeqaya hîkaye û şîîranê kirmanckî amade bika. Hêdî-hêdî eserê nuştoxan resenê adresa xelate. Eserê musabeqa tewr berey ganî 28ê sibata 2017î de bêrîn adresa “Xelata Kovara Vateyî”. Ma wazenîme bîyarîme şima vîr ke wext leze şino, şima eseranê xo çend rew bişawîn karê ma hende asan beno.
Seke şima vînenî na hûmara ma hetê muhtewa ra ê hûmaranê verênan ra tikê cîya ya. Ma waşt her di serredaktoranê xo yê verênan M. Malmîsanij û Munzur Çemî reyra roportaj bikîn ke wendoxê ma hem kar û xebatanê înan hîna nêzdîye ra nas bikîn hem zî kovara Vateyî zî tede prosesê kirmanckîya nuştekî ser o fikrê înan bimusîn. M. Malmîsanij seba çinbîyayîşê wextî ra nêşîya cewabê persanê ma bido labelê roportajê Munzur Çemî na hûmare de ca gêno.
Derheqê kovare de fikir, vînayîş û pêşnîyazê nuştox û wendoxanê kovare zî ma rê zaf muhîm ê. Coka ma tayê wendoxan û nuştoxanê Vateyî ra derheqê kovare de fikrê înan persay. Nê embazan ra her yewî perspektîvê xo ra hem derheqê kovare de û hem zî rewşa kirmanckîya nuştekî ser o gelek fikir û pêşnîyazê maqulî îfade kerdî. Semedê redaksîyonî ra her vateyê nê embazan biqîymet o. Û ma do fikr û pêşnîyazanê înan ra zaf îstifade bikîn.
Nê roportajan ra teber derheqê nuşte û nuştoxanê Vateyî de nuşteyêk J. Îhsan Esparî na hûmare de ca gêno. Sewbîna zî na hûmare de derheqê mewlidê Ehmedê Xasî de beşê dîyinî yê nuşteyê M. Selîm Uzunî, roportajê Guven Yeşîlî şaîrê namdarî ”Silo Qiz”î reyde, meqaleyê Murad Canşad, Mehmud Nêşite, Newzad Valêrî û Huseyn Karakaşî estê. Deniz Gunduz û Pinar Yildiz bi şîîranê xo beşdarê na hûmare benê Û B. Şîlanî na hûmare de zî ma rê di tekstê mizehî nuştê.
Wendoxê delalî,
Kovara Vateyî, weşanê xo heta nika hetê ekonomî ra bi hetkarî û îmka-nanê şima wendoxan û sînayoxanê kirmanckî domnayo. Hûmara Vate-yî ya yewine bi hetkarîya pancês embazanê ke beşdarê kombîyayîşê dîyinî yê Grûba Xebate ya Vateyî bîy, weşanîyaye. Dima zî kovare bi hetkarîya wendoxan weşanê xo domna. Nê pancas hûmaran de, tena çend hûmarî bi hetkarîya Fona Kulturî ya Kurdî weşanîyay. Sewbîna kovara Vateyî, çi organîzasyonanê sîyasî yan zî kulturîyan ra, çi dayîreyanê dewletan yan zî mîyandewletîyan ra hetkarî nêgirewta.
Heta nika kesê ke tewr zaf Vateyî rê ardim kerdo embaz û nuştoxê ma yo rehmetî Wisif Hêlinij (Kaymak) o. Wisifê rehmetî, heta weş bi, nêverda ke ma cayê behsê hetkarîya ey bikîn û ey rê sipas bikîn. La nika bi nê minasebetî ma wazenîme sipasdarîya xo pêşkêşê ruhê ey yê şadî bikime û nê embazê xo yê qedirşinasî bi hesret yad bikime. Osman Akyil, Kamîl Sumbul, Abdurrahman Çelîkkol, Seîd Guven, Şukrî Derîn, Harun Elîaçik, Azîz Bazancîr, Yaşar Bazancîr û Hesenê Metê zî hetkarîya kovara Vateyî kerda, ma nê embazanê erjayeyan rê yew bi yew sipas kenîme.
Peynî de ma Dr. Huseyîn Demîrtaşî rê gelek sipas kenime ke ey zî hetkarîya na hûmare kerd!
Heta hûmara bîne bimanîn weşîye de!
