WENDOXAN RÊ
Wendoxê delalî,
Seke şima zanê Kurdîstan hamnanan germ o. Dîyarbekir gelek cayanê bînan ra germêr o. Grûba Xebate ya Vateyî na kelegerma hamnanî de, Dîyarbekir de seba Kombîyayîşê xo yê 29. kom bîye û ma zaf karê hûmara 49. ya Vateyî zî tîya kerd. Ma wina hîs kenî ke na hûmara ma ra tikê boya na germîya Dîyarbekirî û nuşteyanê heme nuştoxanê ma ra zî gelek boya eşqê ziwanê ma yena. Xora eke nuştoxan û wendoxanê kovara Vateyî de no eşqê ziwanî çin bînî na xebate heta ewro dom nêkerdênê.
Kovare Vateyî serra 2017 de bena vîst serra û goreyê planê redaksîyonî destpêkê eynî serre de hûmara ma ya 50. zî kewena destanê şima. Yanî vîst serrîya kovare Vateyî û weşanîyayîşê hûmara aye ya 50. têkewenî. Kovara Vateyî, kovara kirmanckî ya tewr verên a ke ver bi vîst serrîya xo şona. Coka “hem seba pîrozkerdişê hûmara 50. ya Vateyî hem zî seba berzkerdişê qedr û qîymetê nuştişê kirmanckî (zazakî), Grûba Xebate ya Vateyî kombîyayîşê xoyê 29. de (30.06.2016), qerar da ke yew (jû) musabeqaya hîkaye û şîîranê kirmanckî organîze bika.” Şertê musabeqaya “Xelata Kovara Vateyî” na hûmara ma de neşr bîy. Ma bawer kenê ke wendox û nuştoxê mayê ke wayîrê qabîlîyetê edebî yê beşdarê musabeqa benê û bi no hawa hetkarîya averşîyayîşê edebîyatê kirmanckî kenê.
Wendoxê delalî,
Weşanxaneyê Vateyî bi surprîzêkê gelek weşî ma heme şa kerdê. Bi îmkananê xoyê gelek mehdudan “Ferhengê Kirmanckî (Zazakî)-Tirkî” ke nêzdîyê hezar rîpelî yo, bi kalîteyêkê gelek başî weşana. Pêro pêser o nê ferhengî de pancas hezar çekuyî ca gênê. Nînan ra pancês hezarê xo çekuyê standardî yê bingeyî, duyes hezar zî çekuyê ke têkildarê çekuyanê standardan ê, vîst û hîrê hezar zî versîyon ê. Nê ferhengî de çekuyê ke vîst û hewt Kombîyayîşanê Grûba Xebate ya Vateyî de munaqeşe bîy, estê. Ma ganî her kes hetê xo ra rotiş û vilakerdişê nê ferhengî de Weşanxaneyê Vateyî rê hetkarî bikê ke ê zî bişê (besebikê) eseranê bînan yê winasîyan biweşanî.
Wendoxê delalî,
Gelek nuştoxê neweyî bi nuşteyanê xoyê hêcayan na hûmara Vateyî xemilnenê. Burcu Tîrgîl warê tarîxê fekkî de xebatêka baş kerda. A şahîdanê qirkerdişê Hîris û Heştî gêraya. Înan ra çend kesan reyde qisey kerdo û bi fotografanê gelek başan xebata xo hîna bikalîte kerda. Karêko bîn yê tarîxê fekkî Aydin Baturî kerdo. Ey zî wextê Şêx Seîdî de kişîyayîşê dewijanê dewa Dik û veşnayîşê dewe, fekê tayê kesan ra nuşto.
Derheqê dêrsimjan de, di babetanê cîyayan de, di nuşteyê bînî zî na hûmare de estê. Ugur Sermîyanî xonamekerdişê dêrsimijan ser o Cafer Çîçekî zî bawerîya elewîyanê Dêrsimî de cayê misayîvênî ser o nuşto.
Emîne Barba, Enwer Yagmur, Gurbet Ekinci, M. Mamet Qetekonij, Mehmet Topal, Salih Gunduz, Xurbet Ozçelik wendekarê masterê bêtezî yê Unîversîteya Artukluyî yê. Nînan ra her yewî, yew babete ser o nuşteyêk nuşto.
Tekstê înanê kilmek û tehmweşî ma nawnenê (musnenê) ke merdim şêno ahengêk mabênê hîs, vîr, fikir û ziwanî de peyda biko û bi no hawa form û lezetêko edebî bido nuştişê xo.
Kitabê akademîsyen Ercan Çaglayanî yê peyênî bala gelek kesan ante. Seba ke wendoxê ma na xebate nêzdî ra bişinasnî, na hûmare de, hem nuştoxî reyde yew roportajo derg hem zî kitabî ey ser o nuşteyêk dayîşşinasnayîşî ca gênî.
Murad Canşad na hûmare de zî bi sernuşteyê “Cengê Tavijan û Badikan” yew babeta nenase û balkêşe ser o nuşto. Yew hîkayeya Huseyîn Çakanî û di fiqrayê B. Şîlanî nuşteyê na hûmare yê bînî yê.
Şîîrê na hûmare Pinar Yildiz, Huznî Sûrela û Muhamed Deza Baturî nuştê.
Wendoxê delalî,
Kamîl Sumbulê çêrmûgijî heta nika kovara Vateyî rê gelek reyî hetkarîye kerda. Ma gelek qedr û qîymetê na hetkarîya ey zanî. Keyeyê ey awan bo. Ma Osman Akyılî rê zî zaf sipas kenê ke seba çapkerdişê na hûmare ma rê ardim kerd.
Heta hûmara bîne bimanîn weşî de!
