WENDOXAN RÊ

Wendoxê delalî, 

Ma hûmara çewres û şeşine zî bi xeyr û weşî, bi muhtewayêka gelek dewlemende û cîyaye pêşkêşê şima kenî. Verê ke ma behsê nuşteyanê na hûmare bikîn, ma wazenî Weşanxaneyê Vateyî semedê weşanayîşê kitabê “Kurmancca İle Karşılaştırmalı Kırmancca (Zazaca) Dilbilgisi” ra pîroz bikîn. Bêguman ma nuştoxê nê kitabî, renckêş û pîyonyerê xebata kirmanckî (zazakî) M. Malmîsanijî zî semedê na xebata erjaya ra pîroz kenî. Şima derheqê na xebate de hîna zaf malumatî nuşteyê J. Îhsan Esparî de vênenî. 

Na hûmare de ma ca dayo çend nuşte, roportaj û cigêrayîşanê hêca û balkêşan. Ma xebata Mutlu Canî ra dest pêbikîn. Mutlu Canî çimeyanê nuştekîyan ra bîblîyografyaya sanikanê kirmanckîyan amade kerda. Ey bi baldarîyêka ezamî heme sanikê kirmanckî hem goreyê peynameyê arêkerdoxan hem zî hetê mintiqayan ra tesnîf kerdî û nuştî. Lîsteyê kitabanê sanikan, lîsteyê kitabanê ke sanikî tede estî û lîsteyê kitabanê sanikan yê ke sey kitabanê domanan weşanîyayî zî amade kerdî. Na hûmara de şima şênî qismê yewinî yê na bîblîyografya biwanîn. 

Behzat Tosunî ramitişî ra heta rotişê tutinî heme merheleyanê nê karî ser o nuşteyêk gelek bi qîymet hazir kerdo. Ey kedkaranê nê karî reyra roportajê gelek hîra û bi detay kerdî û bi fotografan na xebata xo xemilnaya. Kar û debara şarê ma ser o nuşteyêko delal zî Şahap Laçînî nuşto. O karê rezanê mintiqaya Gêlî ser o vinderto. Zanayîşê xo ra teber wayîranê rezan reyra qalî kerdo û game bi game heme karê rezan nuştî. Nê her di nuşteyî hetî ra nê waran de zanayîşê ma zîyade kenî û hetî ra zî ma banderê termînolojîyê nê karan kenî. 

Murad Aygunî hunermendê ma yê vengweş û zerrîtenikî Kerem Sevînçî reyra yew roportajo derg kerdo. Ma bawer kenî ke bi nê roportajî wendoxê ma hem derd û DEJê Keremî fehm kenî û hem zî perspektîfê ey ra muzîkî hîna weş şinasnenî. Roportajo bîn zî Alî Aydin Çîçekî şaîr û dengbêj Cemalê Dursî reyde kerdo. Cemalê Dursî bi qiseykerdişê xo yê gelek samîmî derdê zerrîya xo ma rê vano û ma beno serranê 1960î û dewanê Gimgimî ra yew bi yew gêrneno. Ma fehm kenî ke o wext qedr û qîymetê dengbêjanê ma şarê ma mîyan de estbîyo.

Hamza Aksal kirmancanê Heziyî ser o xebitîyayo û no war de tayê malumatê neweyî peyda kerdî. Murad Canşad zî tayê çimeyanê nuştekîyan ra behsê estbîyayîşê deyîr û şîîranê Alîşêr Efendîyî keno. 

Mahmut Yildizî Cewzi ra, Abdullah Gulerî Pîran ra û M. Salîh Kalkanî Pîran û Gêl ra sanik û deyîrî na hûmare rê şawitî. 

Ma hêvîdar ê ke şima hîkayeya Akman Gedîkî ya hîsdare “Dayê, Ez Nêwazena Bimirî” ra û şîîranê Denîz Gunduz û Bedrîye Topaçe ra zî tehm û lezetêko edebî gênî. Na hûmare de ma netîceyê kombîyayîşê vîst û hewtinî yê Grûba Xebate ya Vateyî zî weşanenî. Ma bawer kenî ke bi na xebate kirmanckîya standarde yewna game aver şona. 

Wendoxê delalî, 

Ma hûmara çewres û çarine de nuştbi ke “Kombîyayîşê 27. de Grûba Xebate ya Vateyî qerar da ke 02-01-2016 de Dîyarbekir de seba pîrozkerdişê vîst serrîya Grûba Xebate ya Vateyî şewêka şayî ya kulturî amade bika.” Seke grûbe qerar dayo na şewa şayî 02-01-2016 de Dîyarbekir de bena. Grûba xebate, seba şewêka biserûbere xebata xo domnena. Ma hêvî kenî heme wendoxê Vateyî na şewe de amade benî. 

Heta hûmara bîne bimanîn weşî de!