WENDOXAN RÊ
Wendoxî delalî,
Kovara Vateyî, bi hûmarê xo ya 42. reyna bena mêmanî şima. Ma zaf pê keyfweş ê ke ma yewna hûmara dewlemend û kalîteyine pêşkeşî şima kenî. Ma hêvî kenî ke na hûmare zî (kî) goreyî waşte û zerrîyê şima bo û şima zî pê keyfweş bibî.
Hûmara verêne ya Vateyî, qismî “Wendoxan rê” de, wina amebi nuştene: “Her kovara (dergîya) ke newe vejîyena hêvîyanê neweyan îfade kena.” Rasta zî vejîyayîşî Kovara Vateyî hêvîyeka zaf girde/girse bî. Bêguman na hêvîye zaf hetan ra ameya ca. Ewro, Vate wayîrî yew mîsyonî yo û bîyo sey yew mektebî. Vate, prosesî standardîzasyonî kirmanckî (kirdkî, zazakî, dimilkî) de êdî referens û rêber o. Zaf merdimanê ke Vate de bi şîîr, sanike, hîkaye, fiqra ûsn. dest pêkerdo, ewro beranî (ürün) hêcayan danî û bîyî wayîrî eseran. Rayîro ke Vateyî akerdo şax dayo, reya û rîçikî verdayî, binge girewto. Nê rayîr û bingeyî ser o welat de zaf cayan de kovar û rojnameyî neweyî vejîyenî, kursî ziwanî abenî. Xora metodî ma zî “wendoxan rê” û “wendoxan ra” yo. Yanî ma hem wazenî bidî wendoxan, înan aver berî û biancî mîyanî na xebata derg û dilaye hem zî înan ra bigêrî û bi fikr, pêşnîyaz û krîtîkanî înan Vateyî aver berî.
Zaf eşkera yo ke prosesî standardîzasyonî kirmanckî bi Grûba Xebate ya Vateyî û Kovara Vateyî dest pêkerdo û no proses ewro zî dewam keno. Heta ke no proses dewam bikero rol û muhîmîyê Kovara Vateyî nêbedilîyenî, cayî xo de manenî.
Wendoxî hêcayî,
Na hûmare de şima netîceyanî Kombîyayîşî Vîst û Çarine (24.) yê Grûba Xebate ya Vateyî zî vînenê. Kombîyayîşî 24., mabênî 30.10. 2013- 02.11.2013î de Dîyarbekir de amebi viraştene. Ney ra teber, xeylê nuşteyî edebî, folklorîk, tarîxî û nuşteyî ke bîr û bawerîyê dînî ser o nusîyayî na hûmare de ca gênê. Ma eşkenê bi zerrîweşîye vajî ke hûmara 42. hûmarêda zengîn û balkêş a.
Heto bîn ra ma pê zaf keyfweş ê ke nê serranê peyenan de Kurdîstan de tayê beledîyayan, unîversîteyan, dezgeh û sazgehanî sîvîlan û heta şexsan dest pêkerdo ardim û destek danî xebatê ziwan û kulturî. Mavajime ke di Kombîyayîşî Grûba Xebate ya Vateyî yê ke Çewlîg de virazîyayî, hetî çend merdimanî welatperwer û ziwanheskerdoxan ra ameyî fînansekerdene. Hûmara ke destî şima de ya (42.) zî bi ardimî Abdurrahman Çelîkkolî ameya çapkerdene. Ma sey Redaksîyonî Kovara Vateyî, nê dezgeh, sazgeh û şexsan pêrune rê sipas (teşekur) kenî û hêvî kenî ke şarî ma ardim û destekî xo mebirno û her daîm dewam bikero. Ma ganî çi rey xo vîr a mekerê ke no rayîr de ma çend pîya hereket bikerî û piştî bidî yewbînan, ma hende pîya benî xurt û ziwan û kulturî xo aver benî.
Bi nê xayeyî û na hêvîye heta hûmarêka bîne bimanên weşî û selametîye de.
