WENDOXAN RÊ
Ma bixeyr dî wendoxê hêcayî,
Demêde derg ra dime, ma bi hûmarêda newîye huzurê şima der îme. Derheqê na hûmare de çîyo ke verê veran bêro vatene, bêguman ereykewtişê kovare yo.
Gelo se bî, kamcîn astengî peyda bî ke nêzdîyê serrê yo ke Kovara Vate nêvejîna? Ma wazenîme ke derheqê na perse de bi çend çekuyan şima wendoxan agahdar bikeme.
Seke şima kî zanenê, endamê Redaksîyonê verênî Munzur Çem, Deniz Gunduz û Serdar Bedîrxan bî. Mîzanpaj, çapkerdiş û vilakerdişê kovare, nê embazan ra Deniz Gunduzî ardêne ca. Labelê rîyê tayê probleman ra nê embazî besenêkerd ke nê karî bikero û no rîwal ra kî vejîyayîşê kovare erey kewt.
Grûba Xebate ya Vateyî, Kombîyayîşê 24ine de nê meseleyî ser o vindete û Redaksîyonêde newe weçînit.
Nê Redaksîyonî neweyî deMehmed SelîmUzun, Nureddîn Celalî ûMunzur Çemca genê. Ewro ra pey, viraştişêmîzanpajê kovare Roşan Lezgîn, xebata çapkerdiş (matba) û vilakerdişî kî Deniz Gunduz do bikerê.
Wendoxê hêcayî,
Na hûmare de netîceyê Kombîyayîşanê 22 û 23ine yê Grûba Xebate ya Vateyî pîya ca genê.
Embazanê ma ra Îhsan Espar derûdorê Pîranî ra bi çend deyîranê folklorîkî, Îrfan Kaya bi „Arêyî Zuvêrî“, Aysena Kurdî bi “Tayê Nameyê Nebatan“,Mehmed SelîmUzun bi “Mewlid û Edebîyatî Kirdkî de CayêMewlidî“, Dogan Karasu bi “Ez Lacî Xidî Kalî ya“, Munzur Çem bi “Îbadetê Elewîyan de Cayê Kirmanckî (Zazakî)-II“, Nevzat Valêrî, Îdrîs Yazar û Esna Altun bi şîîranê xo, B. Şîlan kî bi çend fiqrayan ca genê. Bi Nadîre Güntaş Aldatmaz ra roportaj Sêyîdxan Kurijî viraşt, Rejîsoro Kirmanc û Fîlmê Ey kî S. Bedîrxanî amade kerd. Fîhrîstê 40 hûmaranê Vateyî kî şima na hûmare de vînenê.
Wendoxê birêzî,
Asîmîlasyono bêsînor sey vîzêrî kurdan ser o bandura xo ewro kî rameno. Labelê hemberê naye de pêla kar û gureyî kî roje bi roje bena berz. Bi taybetî kî mîyanê ciwanan de, hişarbîyayîşêde balkêş xo nîşan dano. Ciwanê ma her roje zêdetir kuwenê mîyanê xebata ziwan û kulturî. Mavajîme, Çewlig ra komê ciwanan, demêde kilm na ra raver, dest bi vetişê rojnameyêda newîye kerd. Nameyê nê rojnameyî “Zazakî“ yo. Ancî ciwananê ma ra Pîran Baydemîrî, Festîvalê Fîlman yê Antalya de bi fîlmê xo yo kilmmetrajin “Fecîra“, xelatêda zafmuhîme girewte.Ma seba nê gamanê hêcayan nê ciwanan fîraz kenîme û devamê serkewtişê înan wazenîme.
Wendoxê hêcayî,
Kîlitê raverşîyayîşê yewmiletî ziwan, kultur û tarîxê xo rê, nasname û welatê xo rê wayîrvejîyayîş o. Sey miletanê bînan ma kî ganî na rastîye çimanê xo ver ra dûrî mefîme û kar gureyê xo aye ra gore biramîme. Demo peyên de, na çarçewa de mîyanê şarê ma de hişarbîyayîşêde baş xo nîşan dano, pêla xebate roje bi roje bena berz.
Şarê ma bi roşan û şahîyêda taybetîye serra kane xo pey de verdano û kuweno serra newîye. No roşan, mîyanê şarî de sey Gaxan, Serrnewe, Kalo, Sersal, Kose Gelî ûsn. yeno namekerdene. Ma nika ra serneweyê şima fîraz kenîme û hêvîdar îme ke 2014 her het ra şima wendoxan û pêroyîya şarê ma rê bibo serra canweşî û bewxtewarîye, bibo serra serkewtişî.
Heta hûmarêda bîne weşîye de bimanê.
