Xafilbela nameyê kitabê hîkayeyan yê Murad Canşadî yo. Kitab hetê Weşanxaneyê Vateyî ra hezîrana 2008î de ginayo çape ro û 85 rîpelî yo. Kitab de 11 tene hîkayeyî ca gênê: “Ez Hol Zaneno”, “Vilaweke”, “Ahaa Biradero Xoşewîst!”, “Torn”, “Qewe”, “Kelmîzin”, “Keyeyê Roşna û Mîro Kose”, “Xafilbela”, “Bajarê Ma”, “Bostan” û “Heykel”.
Murad Canşadî hîkayeyê xo heme hepisxane de nuştê.
Nê hîkayeyê ey ke bi nameyê
Xafilbela se kitab weşanîyayê, hetê krîteranê edebî û estetîkî ra zaf muhîm ê. Murad Canşadî kankilê edebîyatî ra hîkayeyê xo mundê. Bê mubalexe û bêmunaqeşe, merdim şêno vajo ke edebîyatê kirmanckî, bi taybet hîkaye de, nê kitabî reyde ruşdê xo bi temamî îsbat kerd.
Murad Canşad, derba verêne de musneno ma ke ey bi westayîye dest bi edebîyatî kerdo. Ey edebîyat baş şinasnayo; îmkanê edebîyatî, malzemeyê edebîyatî, meydanê edebîyatî baş nas kerdo, coka bi îstîqrar dest bi edebîyatî kerdo.
Xasîyetêko tewr muhim yê hîkayenuştişî no yo ke hîkayenuştox cumleya tewr verêne de bizano ke cumleya peyêne çi ya, hîkaye senî qedîna. Murad Canşad heme hîkayanê xo de naye weş zano. Hîkayeyê ey heme bi yew fînalo muhîm qedînê.
Hîkayeya bi nameyê “Xafilbela” û ya bi nameyê “Keyeyê Roşna û Mîro Kose” bi terzêko surrealîst nusîyayê. Nê her di hîkayeyî, terzê surrealîstî de edebîyatê ma de di nimûneyê muhîm ê.
Heto bîn ra, nê davîst-hîris seranê peyênan de bi deshezaran kurdî kewtî heps. Zafê înan da-des serran ra vêşêr hepisxaneyan de mendî. Ez bi xo nêzana ke rewşa hepisxaneyan senîn a. Hetanî ke merdim tede nêcuyo, merdim baş fehm nêkeno. La hetê edebîyatî ra hepisxaneyan de yew ekolo ke merdim bi yew xeta qalinde îşaret biko nêvejîya. Mesela, kurmanckî de zêde çîyê nêaseno.
No ziwano şîrin û no edebîyato qelîteyin, ke verara nê ziwanî de zîl dayo, layîqê her tewir heskerdiş û xizmetî yo.
