WENDOXAN RÊ
Wendoxê delalî,
Ma bi keyfweşî hûmara peyêne ya serra 2020î pêşkêşê şima kenê û bi zerrîya safî serrneweyê şima pîroz kenê. Ma hêvî kenê ke serra 2021î de azadî û aramî hîna vêşî, zulm û neheqî hîna kêmî bî.
Wendoxê delalî,
Bêşik ma het qedr û qîymetê her hûmara kovara Vateyî zaf o. Ma bawer kenê her hûmare ra ziwanê ma hêz û qewet gêno. Her hûmare de vateyê ma hemverê neheqîya tarîxî newe ra sere hewa danê û ver bi azadîya xo gamanê neweyan erzenê. Her hûmare de ma kedêka îlmî, edebî û nurê çimanê nuştoxanê kovare vînenê. Her hûmare de ma renca dest û ereqê çareyê kedkar û sînayoxanê ziwanê xo vînenê. La reyna zî tayê hûmarê Vateyî hiş û zerrîya ma de benê wayîrê yew cayê xasî. Hûmara 66. nînan ra yew a. Çunke na hûmare de ma netîceya musabeqaya dîyine ya hîkaye û şîîranê kirmanckîyan eşkera kenê û çend eseranê ke xelate girewta weşanenê.
Kovarê ke bi nameyê xo wayîrê yew xelata edebî yê, kêmî yê. No war de beno ke kovara Vateyî Kurdistanê Vakurî de bêemsal ba. Bêguman ma wazenê çalakîyê edebîyê winasî hîna zaf bibê, bi kirmanckî kovar û rojnameyê neweyî neşr bibê û ziwanê ma bi taybetî mîyanê roşnvîr û entellektuelanê ma de bibo yew elemento bingeyî yê nasnameyê înan yê nuştoxî. Ma wazenê roşnvîrê ma bi eseranê xo yê edebî û zanistîyanê kirmanckîyan bêrê şinasnayene. Qedr û erjê keda înan bêro zanayene û bi no hawa ê hem seba nesilanê ameyoxan bibê nimûne hem zî vilabîyayîş û populerbîyayîşê ziwanê ma rê bibê sebeb. Ma bawer kenê ke Xelata Kovara Vateyî averberdîşê nê prosesî de gamêka muhîm a.
Wendoxê delalî,
Heta 15ê tebaxa 2020î 17 şîîrî û 24 hîkayeyî amey adresa xelate. Di beşdaran ra her yewî di şîîrî musabeqa rê şawitibîy û çend kesî zî beşdarê her di beşanê musabeqa bîbîyî. Keyeyê pêrune awan bo. Eseranê ke xelate girewta xora kovare de yenê weşanayene. Eseranê bînan yê musabeqa zî redaksîyon do goreyê rewşe vera-vera biweşano. Netîceya musabeqaya Xelata Kovara Vateyî ya dîyine 18ê kanûne 2020î de, Dîyarbekir de îlan bî. Goreyê puananê jurîyê şîîran rêza panc şîîranê verênan wina ya:
1)Dilo Bargiran Girêyo Kor
2)Îdris Yazar Pencikê Bêrî
3)Îbrahîmê Xaşxaşe Çimkewkine
4)Enwer Yilmaz Vanê Simko Merdo Wayê
5)Canê Dilo Hesrete Zimena
Goreyê puananê jurîyê hîkayeyan rêza panc hîkayeyanê verênan wina ya:
1)Yaqub Guven Zanayê Şarê Xo
2)Îrfan Akdag Sung
2)Erkan Yildirim Hewnê Gozêre
3)Cuma Karakuş Perperokê Sîdûrî
3)Hesen Polat Mi Ziwanê Xo Yew Zarace ra Girewt
4)Cemal Pîranij Punik
4)Enwer Yılmaz Pastaxane
5)Mehmet Selim Özak Sofî Qadir
5)Nazim Kalkan Sipî
Seke rêzkerdişê corênî ra zî fehm beno beşê hîkayeyan de xelata yewine ra teber her yew rêze de di eserî estê, çike puanê înan seyyewbînî bîy.
Wendoxê delalî,
Hetê muhtewa ra na hûmare gelek dewlemend a. Şima verê hîrê şîîran û hîkayeya yewine ya Xelata
Kovara Vateyî wanenê. Dima derheqê etîmolojîyê kirmanckî de xebatêka hîraya zanistî ya M. Malmîsanijî ca gêna. Na hûmare de ma beşê yewine yê na xebate weşanenê. Yewna xebata M. Malmîsanijî ke na hûmare de weşanîyaya derheqê qeraranê Mehkemaya Îstîqlalî ya Rojhelatî de ya.
Aydin Batur dayîşşinasnayîşê mintiqayanê Çewlîgî na hûmare de zî domneno. Na reye şîyo mitiqaya Şê Evilayî û ê cayan ra gêrayo û gelek kesan reyde qalî kerdo û nuşteyê xo de ca dayo tayê çimeyanê nuştekîyan zî. Seîd Verojî bi nameyê “Ferhengê Heyatî” karûbarê dewan ser o yew nuşte amade kerdo. Hîkayeyê na hûmare Osman Aytar, Pinar Yildiz, Mehmud Nêşiteyî nuştê. Şîîranê xelate ra teber, şîîrê Govende Zîne û Ramazan Qetekonijî na hûmare de ca gênê. Huseyîn Turhalliyî meseleyê 1925 ser o vîrameyîşêkê bawkê xo nuşto û Afat Yalinkayayî zî meseleya Awa Enqerîsî. Mewzûyê nuşteyê Elîda Zerrî vegan ê, yê Doxan Karasuyî zî mefhuma “mubalexa”. Mehmed Elî Gaharijî zî derheqê kitabê Îdris Yazarî de sey wendoxêk fikrê xo nuştê. Îsmet Borî zî na hûmare de yew mesela newe ra nuşta.
Vatişê mayo peyên: Keyeyê Ehmed Akdagê pîranijî awan bo ke na hûmare de ma rê ardim kerd.
Heta hûmara bîne bimanê weşîye de!
