WENDOXAN RÊ
Wendoxê delalî,
Wa hûmara şeştîyine xeyrêne ba!
Çimê şima wendoxan, nuştoxan û heme kesanê bînanê ke na xebate de kede werda roşn bî ke ma weşanîyayîşê hûmara şeştîyine ya kovara xo zî dîy.
Wendoxê delalî,
Derheqê nê şeşt hûmaranê Vateyî de merdim şîyêno zaf çîyan vajo la verê bê ke ma zaf sereyê şima bidejnîn, ma wazenî derheqê nuştoxanê nê şeştî hûmaran de tayê melumat bidîn. Nê şeştî hûmaran de nuşteyî 261 kesan weşanîyay, nê nuştoxan ra 30 nuştoxê cinî yê, eserê 23 nuştoxan zî tercume bîy. Nê des hûmaranê peyênan de 25 nuştoxê kovare zîyade bîy û nuştoxanê neweyan ra panc hebî cinî yê. Bêguman nê nuştoxan ra tayênan zaf tayênan tikê û tayênan tena yew nuşte nuşto la na kovare yew berhema keda ma ya muşterek a yanî nê 261 nuştoxî pêro wayîrê na kovar ê û ma bawer kenî ke heme nuştoxê ma wayîrîya kovara xo kenî.
Ma wazenî hûmara tayê babetanê nuşteyanê kovare ra zî şima haydar bikîn: Nê şeştî hûmaran de 426 şîîrî, 94 hîkayeyî, 97 roportajî, 87 sanikî, 102 deyîrî, 48 meqaleyê edebî û kulturî, 39 dayîşşinasnayîş û rexneyê kitaban, 200 fiqra û meseleyî, 29 meqaleyê ziwan, gramer û rastnuştişî, 41 nuşteyî vîrameyîşan, 29 portreyê kesan, netîceyê 29 kombîyayîşanê Grûba Xebate ya Vateyî û gelek babetanê bînan de zaf nuşteyî nusîyay. Seke yeno zanayene hetê hecmê rîpelan ra her hûmare cîya ya la pêro pîya nê şeştî hûmarî 7672 rîpelî yê.
Wendoxê delalî,
Peynîya serra 2018î de Grûba Xebate ya Vateyî seba kombiyayîşê 31. Dîyarbekir de kom bî. Grûba hîna zaf termanê beledîya ser o gurîyay la gelek çekuyê bînî zî munaqeşe kerdî. Na hûmare de ma ca da netîceya kombîyayîşê 31. Na hûmara ma hetê şîîran ra dewlemend a, şîîrê na hûmare Pinar Yildiz, Newzad Valêrî, Îbrahîmê Xaşxaşe, Dogan Karasu û Turabî Kîşînî nuştî. Roportajê na hûmare Nadîre Guntaş Aldatmaz nuştox Roşan Lezgînî reyde kerdo. Roşan Lezgînî nê roportajî de derheqê kar û xebata xo de agahî day û derheqê nuştoxîye û edebîyatî xo de fikrê xo vatî. Ma na hûmare de hîkayeyê Mehmud Nêşite, Şenay Asutay û Bavê Nazê zî weşanay. Aydin Batur mintiqaya Sîwûney û derûdorê Koyê Sipî ra gêrayo û derheqê ê cayan de nuşteyêk nuşto ke tede gelek melumat esto. Yew nuşteyê Pinar Yildiz û yew xebera Îbrahîmê Xaşxaşe ra teber na hûmare de fihrîstê 60 hûmaranê Vateyî zî ca gêno.
Peynî de ma wazenî nuştoxê erjayeyî Hesenê Metê rê gelek sipas bikîn ke ma rê hetkarîye kerda. Keyeyê ey awan bo!
Wendoxê delalî,
Gama ke kovare weşanîyayîşî rê amade bibîy û do bişîyênî çapxane ma xebera wefatê embazê xo Ehmed Kasimogluyî (Ehmedî Dirihî) girewte. Ma bi na xebere zaf dejay û xemgîn bîy. Ma keye, merdim, dost û embazanê kek Ehmedî rê sebir û metanet wazenî. Hûmara 61. de ma do wefatê Ehmed Kasimogluyî ser o binusîn.
Heta hûmara bîne bimanîn weşîye de!
