WENDOXAN RÊ
Wendoxê delalî,
Hûmara 57. bi nuşteyê nuştox û kedkarê ziwan û kulturê ma Munzur Çemî dest pêbena. Nuşte de behsê herêmêda (mintiqayêda) Spanya Endulusî beno. Nuştox nê hamnanê demêk ê cayan ra gêrayo, ey gelek çîyê dîyî û vînayî û tayê çimeyanê nuştekîyan ra zî ewnîyayo. Dima tarîx, kultur, Malaga, Picasso, Elhemra, dansê flaminco, turîzm û gelek çîyanê bînan ser o, bi yew ziwanê sivik û weşî nuşteyêde înformatîf nuşto.
Na hûmare de nuşteyê balkêşî yê bînî zî estî. Eke bêro vîrê şima çend hûmaranê Vateyî yê verênan de derheqê tayê kar û gureyanê xaman de nuşteyî weşanîyabîyî, mavajî ramitiş û hasilkerdişê tutinî, kar û barê weyekerdişê rezan ûsn. Na hûmara de zî Mehmet Topalî derheqê senet û meslegêde zaf kanê welatê ma de yew xebate kerda. Mehmet Topal viraştişê “cilanê heywananê barî” ser o xebîtîyayo. O verê derheqê nê karî de tayê zanayîşê tarîxî dano, dima heme merheleyanê nê karî yew bi yew îzeh keno. Semedo ke nuştox bi xo zî nê karî zano, na babete ser o gelek detayanê zaf hurdîyan ser o zî vindeno. Heme malzeme û hacetanê nê karî, tewir bi tewir cilanê barî û xususîyetanê înan yê muhîman, senetkaranê namdaran yê derûdora Dîyarbekir, Riha û sewbîna gelek çîyanê bînan hem nuseno û hem zî bi fotografanê gelek weşan musneno ma.
Bêguman xebatê winasî hetê kultur, folklor û şinasnayîşê produksîyonê komelî ra muhîm ê, la hîna zaf hetê ziwanî ra ehemîyetê înan esto. Seke yeno zanayene, heme meslegî wayîrê ziwanêde taybetî yî mavajî eke merdim xebatêda winasî nêko termînolojîyê nê karî nênusîyêno û nêbeno beşêde ziwanê nuştekî.
Wendoxê delalî,
Aydin Batur dayîşşinasnayîşê herêmanê cografîkan yê welatê ma domneno. Hûmara 56. de herêma Azarpêrtî (Azaxpêrtî) nuştbî, na hûmare de zî herêma Xorxolî dano şinasnayene. Seke nameyê nuşteyê ey ra zî fehm beno na herême de di koyî namdarî estî; nê koyî hetê bawerîya kurdanê elewîyan û armenîyan ra bimbarek î, bitaybetî koyê Sulvisî. Nuşte derheqê demografîyê herême de û têkilîya tayê hedîseyanê tarîxîyan û nê cayan de zî gelek melumat dano.
Pinar Yildiz bi munasebetê tezê xo yê masterî fekê kirmancanê (zazayanê) Qerejdaxî ra tayê sanikî zî arê dabîyî. Zafaneyê nê sanikan fekê gedeyan (qeçekan, domanan) ra qeyd kerdî. Nê sanikî naskerdişê kirmanckîya na herême ra teber, hetê fehmkerdişê prosesê bedilîyayîşî ziwanî ra zî muhîm î.
Nuşteyê bînî yê na hûmare nê yê: Mutlu Canî roportajêde kilmek ke kovara “Psycology Kurdî” M. Malmîsanijî reyra kerdo, kurmanckî ra çarnayo kirmanckî ser. Seyîdxan Kurijî hîkayeyêda bi nameyê “Payîzê Merdiş Zor o” nuşta. Welat Ramînazadî ehemîyet û bi hawayêde kolektîf arêdayîşê folklorî ser o yew meqale nuşta. B. Şîlanî na hûmare rê zî di fiqrayî şawitî. Şîîrê na hûmare hetê MM, Pinar Yildiz û Akman Gedîkî ra nusîyay.
Peynî de ma wazenî wendoxanê xo yê Almanya agahdar bikîn ke adresa kovara Vateyî ya Almanya vurîyaya (bedilîyaya). Adresa newa na ya:
Seyîdxan Kurij, Kammer str. 154, 47057 Duisburg / Deutschland
Heta hûmara bîne bimanê weşîye de!
