WENDOXAN RÊ

Wendoxê erjayeyî, 

Hûmara çewres û heştine ya kovara Vateyî destê şima de ya. Kovara Vateyî aşma tebaxa 2017î de bena vîst serra. Labelê hema zî amadekerdişê her hûmara newa de ma sey hûmara yewine biheyecan ê. Çunke her hewe ma wazenî yew kovara hîna biserûbere û hîna dewlemende pêşkêşê şima bikîn. Ma zaf xîred kerd ke na hûmara ma zî bi zerrîya şima biba û şima wendişê aye ra tehm û lezetêk bigirîn. 

Welatê ma heme hetan ra yew prosesê gelek dînamîk ra vêreno. Mabênê hîrê aşman de gelek çîyê başî û xirabî qewmîyênî. Nê hîrê aşmanê peyênan de çîyanê zaf başan ra yew zî no yo: 21ê adara 2016 de yanî roja newroze de JIYAN TVyî Dîyarbekir de dest bi weşanê kirmanckî (zazakî) kerd. Goreyê vatişê xebatkaranê televîzyonî, JIYAN TV vîst û çar saetî weşan keno û programê televîzyonî sera heştay kirmanckî yê. Tarîxê ma de reya verên a ke yew televîzyon hende saetî kirmanckî weşan keno. Coka semedê bihêzbîyayîş û averşîyayîşê kirmanckî ra ma weşanê nê televîzyonî gamêda zaf zaf muhîm vênenî. Ma hêvî kenî ke emrê JIYAN TVyî derg bibo û televîzyonê winasî hîna vêşî bibî. 

Wendoxê erjayeyî, 

Şima zanî ke yew grûba nuştoxanê ma yê hepsîyan esta. Nê embazî timûtim babetanê gelek cîyayan de nuşteyanê xo yê hêcayan kovare rê şawenî. Ma sey redaksîyonî zaf qedr û qîymetê keda nê embazan zanî û hêvî kenî ke hepsîyê bînî zî ma rê binusîn. Na hûmare de çend nuşteyê nê nuştoxan estî. Murad Canşadî bi nameyê ”Kesa” û Huseyn Çakanî zî bi nameyê ”Kûnd”î di hîkayeyî ma rê şawitî. Nînan ra teber Murad Canşadî seba na hûmara Vateyî qismê pancin yê eserê Ehmedê Xanî ”Mem û Zîn” çarnayo kirmanckî ser. Qasê ke ma zanî qismêk tena bo zî reya verên a ke ”Mem û Zîn”a Xanî kirmanckî neşr bena.

Sewbî zî na hûmare de ma ca da di roportajanê balkêşan. Roportajo verên, Pinar Yildiz bi nuştox û kedkarê xebata kirmanckî Munzur Çemî reyde kerdo. Bi nê roportajî şima panaromayêk cuye û nuştoxîya Munzur Çemî vênenî. Seyîdxan Kurijî zî nuştox û hunermend Qadir Buyukkayayî reyra qisey kerdo. Qadir Buyukkaya hem behsê şehîdê Kurdîstanî Necmedîn Buyukkayayî hem zî behsê karê xo yê edebî û hunerî keno. 

Mehmed Selîm Uzunî derheqê Mela Huseyn Hênî û eseranê ey de seba na hûmare nuşteyêk hazir kerdo. Akman Gedîkî bi ziwanêkê weşî ”Haşîmê Apê Îsî” nuşto. Na hûmare de bi nameyê ”Alfabeya Kurdkî Ser o Tayê Zanayîşê Bingeyî” nuşteyêk J. Îhsan Esparî zî ca gêno. 

Beşê şîîran de şîîrê Gule, Alî Aydin Çîçek, Deniz Gunduz, Azad Ararat, Serkan Karadagî estî. Şarê Dêrsimî mîyan de bawerîya milaketan ser o Erdal Gulî nuşteyêk amade kerdo, beşê folklorî de xebatêka bîne Alî Aydin Çîçekî kerda. Ey mintiqaya Gimgimî ra ”Duayî û Zewtî” arê dayî. 

Rîpelê fiqra û meseleyan de tekstê  B. Şîlan û Murad Canşadî ca gênî. 

Hûmara 47. de Esra Teyhanî bi nameyê Jîyarê Dêrsimî (Zîyarê Dêrsimî) yew nuşte nuştbi. Aye nuşteyê xo de behsê ”Jîyara Sulbisî” zî kerdbi û vatibi ”Na jîyare nêzdîyê Qisleyî de ya.” Nê îfadekerdişî de kêmaneyêk esto. Rastî wina ya: ”Jîyara Sulbisî” mabênê Xorxol (Yayladere) û Qisleyî de ya la hetê îdarî ra pabesteyê Xorxolî ya. 

Ma Osman Akyılî rê zaf sipas kenî ke seba çapkerdişê na hûmare ma rê ardim kerd. 

Heta hûmara bîne bimanîn weşî de!